Улаанбаатар хотын Захирагчийн ажлын алба, Нийслэлийн Цагдаагийн удирдах газар, Нийслэлийн Мэргэжлийн хяналтын газар хамтран худалдаа, үйлчилгээний байгууллагуудад хяналт шалгалт хийж байна.

Шалгалтаар хэд хэдэн нийтлэг зөрчил илэрсэн. Тодруулбал, үйлчлүүлэгчийн дархлаажуулалтын хоёр тунд хамрагдсан гэрчилгээг шалгахгүй, халуун хэмжихгүй оруулах, ажилчдын дархлаажуулалтад хамрагдсан гэрчилгээг хэвлэж тавиагүй, ширээ хоорондын зайг мөрдүүлээгүй, нэг ширээнд олноор нь суулгах, механик агааржуулалтыг хэвийн ажиллуулаагүй зэрэг зөрчил илэрлээ.

Иргэд, аж ахуй нэгж байгууллагуудаар үйлчлүүлэхдээ хариуцлагатай байж, хүн хоорондын зайгаа барьж, маскаа зүүх, халдвар хамгааллын дэглэмээ сахих шаардлагатай байгааг албаныхан сануулж байна.