Зуны урин дулаан цаг ирсэн ч эрдэнэт хүний амь насанд учирдаг цаг бусын эрсдэл нэмэгддэг нь хэвээрээ байна. Нүдгүй шуурга, цас мөс, үер ус,  гал түймэр, хатуу  хэцүү бүхний өмнөөс өөрийн амь насаа золин явдаг цөөхөн эрэлхэг хүмүүс бол Онцгой байдлын газрын дайчид билээ. Тэднийг эгэл хүмүүсийн дундаас тэнгэрийн хилэгнэлийн өөдөөс сөрөн зогсох үүрэг хүлээсэн баатрууд гэж нэрлэхэд болно. Тиймээс Онцгойгийн дайчид бол онцгой хүмүүс. Онцгой байдлын ерөнхий газрын дайчид 2019 он гарсаар 842 хүний амь насыг авран хамгаалжээ.  Улсын хэмжээнд он гарсаар эхний зургаан сард нийт 2957 удаагийн гамшиг, аюулт үзэгдэл, ослын тохиолдол бүртгэгдэж, үүний улмаас 112 хүн амь насаа алдаж, 38 хүн гэмтэж бэртэн, 24.763 толгой мал, амьтан хорогдож, 6.4 тэрбум төгрөгийн шууд хохирол учирсан байна. Дээрх аюулт үзэгдэл, ослоос Онцгой байдлын байгууллагын алба хаагчид төр, байгууллага, аж ахуйн нэгж, иргэдийн 35.9 тэрбум төгрөгийн өмч хөрөнгийг авран хамгаалжээ.  Өнгөрсөн оны мөн үетэй харьцуулахад гамшиг, аюулт үзэгдэл, ослоос аварсан эд хөрөнгө 9.3 тэрбум төгрөгөөр өсчээ. Нийт тохиолдсон аюулт үзэгдэл, ослын 89 хувь буюу 2634 нь гал түймэр, зургаан хувь буюу 71 нь хүний буруутай үйл ажиллагаанаас, гурван хувь буюу 87 нь биологийн гаралтай үйл ажиллагаанаас, хоёр хувийг буюу 56 нь ус, цаг уурын гаралтай аюулт үзэгдэл тус тус эзэлсэн байна.