Улсын хэмжээнд бүрэн дунд боловсрол олгодог төр, хувийн хэвшлийн 839 ерөнхий боловсролын сургуульд нийт 700 мянган хүүхэд суралцаж байна. Үүнээс хувийн 167 сургуульд 50 мянган хүүхэд суралцдаг. Нөгөө талд улсын сургуулийн нэг анги 50-60 хүүхэдтэй, 2-3 ээлжээр ачаалал өндөртэйгээр хичээллэдэг.

Манай улсын боловсролын бодит нөхцөл байдал бол төрийн өмчит сургуулийн дийлэнх нь барилгын насжилт өндөртэй, анги танхим нь хөгц мөөгөнцөрт “идэгдсэн”, спорт заалгүй гэх мэт наад захын стандарт, эрүүл, аюулгүй орчинд суралцах боломж, нөхцлөөр хангагдаж чаддаггүй. Нэг ангид 50-60 хүүхэд хичээллэж, үүнийг дагаад багшид ирэх ачаалал нэмэгддэг. Хэт их ачаалалтай ажиллаж  байгаа багшаас чанартай, хүртээмжтэй боловсрол хүлээгэд нэмэргүй.

Тиймээс улсын сургуулийн сурах орчин, сургалтын арга барил нь таалагдаагүй тул эцэг эхчүүд хүүхдээ эцэг эхчүүд хүүхдээ хувийн сургуульд сургахаар өөр сонголтгүй болж байгаа юм.

Одоогийн боловсролд хөрөнгө зарж байж, ирээдүйд тэд баялаг бүтээнэ. Сургуулийн тоог нэмэхгүйгээр хэчнээн сайн багшаар хичээл заалгаад ч нэг ангид 50-60 хүүхэдтэй тохиолдолд хичээл хүртээмжгүй хэвээр байх болно. Хэрвээ улсын төсвөөс хөрөнгө зарахгүй гэж байгаа бол хувийн сургуулиудтайгаа учир зүйгээ олоод, тэднийг төр бодлогоор дэмжээд явах ёстой. Одоогоор үйл ажиллагаа явуулж буй 167 хувийн сургууль дээрх ачааллыг хуваалцахад бэлэн байсаар байна.