Олон улсад бүртгэгдсэн сармагчны цэцэг өвчний талаар Эрүүл Мэндийн Яамны (ЭМЯ) Нийтийн эрүүл мэндийн газрын Халдварт өвчний хэлтсийн дарга Л.Энхсайхан мэдээлэл өглөө. 

Тэрбээр "Энэ өвчнөөс урьдчилан сэргийлэх чиглэлээр тандалт хийх, бэлэн байдлыг хангах, эрсдэлийн харилцаа холбоог идэвхжүүлэх төлөвлөгөө гаргаж байгаа. Эхний ээлжид хилийн нэвтрэх цэгийн тандалтыг сайжруулах, нийслэл болон орон нутгийн эрүүл мэндийн байгууллагад мэдээлэл өгч, эмч ажилчдыг сургаж хариу арга хэмжээг идэвхжүүлж ажиллана. 

Түүнчлэн эрсдэлийн үеийн үнэлгээ хийж харьяа эрүүл мэндийн байгууллагад мэдээлэл хүргэх юм. Халдварт өвчин батлагдсан тохиолдолд тухайн хүнийг хамгийн багадаа 14 хоног тусгаарлах шаардлагатай. Өөрөөр хэлбэл, тууралт бүрэн эдгэх хүртэл тусгаарлагдах хэрэгтэй. Энэ чиглэлээр хилийн боомтынхон болон эмнэлгийн ажилчдад мэдээлэл өгнө" гэлээ.