Зээлийн батлан даалтын сангаас ипотекийн зээлийн урьдчилгаа төлбөрийн 60 хувьд батлан даалт гаргаж байна. Нийт орон сууцны үнийн дүнгийн 18 хувийг тус сангаас батлан дааж байгаа гэсэн үг юм. 2021 онд Зээлийн батлан даалтын сангийн тухай хуульд нэмэлт, өөрчлөлт оруулж, ипотекийн урьдчилгаа төлбөрийн батлан даалт гаргах эрх зүйн орчин бүрдсэн байна. Засгийн газрын 2021 оны 42 дугаар тогтоолоор Зээлийн батлан даалтын сангийн өөрийн хөрөнгийг нэмэгдүүлж, ипотекийн зээлийн батлан даалт гаргах санхүүжилтийн асуудлыг шийдвэрлэжээ. Хуулийн хэрэгжилт энэ оны хоёрдугаар сарын 15-наас хэрэгжиж эхлээд Дархан-Уул, Орхон аймгуудад нийт дөрвөн харилцагчтайгаар анхны ипотекийн урьдчилгаа төлбөрийн батлан даалтыг гаргаж эхэлсэн байна.

Үүнтэй холбоотой мэдээллийг Зээлийн батлан даалтын сангийн газрын дарга Э.Тамир өглөө. Тэрээр “Монголбанкны орон сууцны ипотекийн зээлийн санхүүжилтийн журам гэж бий. Энэ журамд зээлийн хэмжээ, хугацаа зэргийг заасан байдаг төдийгүй одоог хэр нь хэвээр мөрдөгдөж байна. Өнөөдрийн байдлаар орон нутагт орон сууц худалдан авах иргэдэд 100 сая хүртэлх төгрөгийн зээл, нийслэлд 150 сая төгрөгийн зээл олголт хийгдэж байгаа. Тодруулбал ипотекийн урьдчилгаа төлбөрийн батлан даалт нь зөвхөн орон нутаг болон Улаанбаатар хотын алслагдсан гурван дүүрэгт /Налайх, Багануур, Багахангай/ олгогдож байгаа юм. Одоогийн байдлаар Төрийн банк, Капитрон банк, Худалдаа хөгжлийн банк, Богд банк гэсэн арилжааны дөрвөн банктай гэрээ байгуулсан. Үлдсэн арилжааны банкнууд удахгүй хамтран ажиллана. Мөн Ипотекийн урьдчилгаа төлбөрийн батлан даалт нь Нийслэл хотын төвлөрлийг сааруулах, иргэдийг орон сууцжуулах хүрээнд хэрэгжиж байгаа. Гол тавигдах шаардлага нь Монголбанкны орон сууцны ипотекийн санхүүжилтийн журамд заасан шаардлагад үндэслэнэ. Харин Зээлийн батлан даалтын сангаас урьдчилгаа төлбөрийн хуримтлал үүсгэж чадаагүй иргэн байх, орон нутагт орон сууц худалдаж авах гэж байгаа иргэн байх гэсэн үндсэн хоёр шаардлагыг тавьж байна. Насны хувьд хязгаарлалт тавьсан зүйл байхгүй. Зээлийн эх үүсвэрийг Монголбанк, Засгийн газрын аль нь ч шийдсэн бай ипотекийн урьдчилгаа төлбөрийн батлан даалт “Зээлийн батлан даалтын сан”-гаас хэвийн гарна. Өнөөдрийн байдлаар Зээлийн батлан даалтын сан дээр ирсэн хүсэлт байхгүй.

Ипотекийн урьдчилгаа төлбөрийн батлан даалтад Засгийн газраас 50 тэрбум төгрөгийг төсөвлөхөөр болсон бөгөөд 20 дахин нэмэгдүүлсэн хэмжээгээр батлан даалт гаргах боломжтой гэсэн үг. Ерөнхийдөө нэг их наяд төгрөгийн батлан даалт гаргах боломж бүрдэж байгаа юм” гэв.