Монголын Морин Спорт Уяачдын Холбооноос гурван жил тутам зохион байгуулдаг хурдан морины “Их хурд” уралдааныг энэ жил “Шигшмэл хурдан морьдын “Их хурд-8”, Монгол туургатны морины өв соёлын наадам” нэртэйгээр зохион байгуулна гэж ММСУХ-ны тэргүүлэгч, тус наадмыг зохион байгуулах комиссын дарга Б.Бадраа мэдэгдлээ. Энэ сарын 20, 21-ний өдрүүдэд Хүй долоон худагт болох энэ наадмаар сүүлийн гурван жилд улс, бүс, аймгийн баяр наадамд амжилт гаргаж, болзол хангасан шигшмэл азарга, их нас, шилмэл хурдан морьд уралдуулахаас гадна аймаг сумдад болсон “Адуучин”, “Хос сайхан морьтон” шалгаруулах тэмцээнээс шалгарсан шилдгүүдийг оролцуулсан төрөл бүрийн уралдаан тэмцээн зохиох юм байна. Мөн “Сайхан хос морьтон” шалгаруулах тэмцээн, “Хуйрнан шуугигч” хүүхдийн барилдаан, “Гийнгоо марзай”-н улсын уралдаан жороо морины уралдаан, сонгомол морин спортын үзүүлэх тоглолт, морин циркийн үзүүлбэр үзүүлэх юм байна.