Ерөнхий сайд Л.Оюун-Эрдэнэ энэ 2023 оныг авлигатай тэмцэх жил болгон зарлаж “5Ш” ажиллагаа явуулж байгаа. Авлигатай тэмцэхэд гол саад тээг нь улс төрийн өндөр албан тушаалтнууд хариуцлага хүлээдэггүй, сугараад үлддэгийг болиулна гэж буй. Яг энэ үед Нийслэлийн Засаг дарга Д.Сумъяабазар тэргүүтэй Нийслэлийн өндөр албан тушаалтнууд ногоон автобусны хэрэгт холбогдчихсон. Авлига хээл хахуулын томоохон хэрэг задраад ирэнгүүт олны өмнө хариуцлага хүлээсэн болж албан тушаалаасаа буусан болоод өнгөрөх үү. Эсвэл нууцын зэрэглэлд оруулж, Засаг даргын захирамжын ард улс орныг хохироосон илэрхий авлигын шинжтэй хэрэгтээ хуулийн байгууллагаар шалгуулах уу гэдэг нь одоог хүртэл олон нийтийн анхаарлын төвд байсаар байна.

Ийнхүү Засгийн газар нь авлигатай тэмцэж байх зуур Нийслэлийн Засаг дарга Д.Сумъяабазар тэргүүтэй нийслэлийн авлигын томоохон сүлжээ задарсан байхад шүгэл үлээж буй Засгийн газар нь ялгаваргүйгээр шударга ажиллаж чадах эсэхийг харцгаая. Ерөнхий сайд Л.Оюун-Эрдэнийн авлигатай тэмцэх тэмцэл Д.Сумъяабазарын өмнө очоод бүдрэх үү?