Гурван жил тутамд нэг удаа зохион байгуулагддаг “Их хурд-8” уралдаан өнгөрсөн амралтын өдрүүдэд Хүй долоо худагт боллоо. Эхний өдөр болсон азарганы уралдаанд Төв аймгийн Баян сумын уугуул, Монголын морин спорт уяачдын холбооны тэргүүн дэд ерөнхийлөгч Б.Нямжавын хурдан хээр азарга түрүүлж, түмэн олныг баясгалаа. “Монгол туургатны морины өв соёлын наадам” нэртэйгээр Хүй долоон худагт зохион байгуулагдаж буй “Их хурд-8” наадмын түрүү магнай эзэндээ “Land cruiser-200” маркийн төмөр хүлгийн түлхүүр атгуулсан бол уралдаанч хүүхдийг нэг өрөө байраар шагнажээ. Хурдан хээр азаргыг Төв аймгийн Зүүндэлгэр сумын хоёрдугаар ангийн сурагч Б.Энхбаяр гэдэг найман настай хүү унаж, уралдсан байна.

Азарганы аман хүзүүнд энэ жилийн Үндэсний их баяр наадмын түрүү магнайд хурдалсан, Монгол Улсын Тод манлай уяач Д.Ононгийн хүү, Дорнод аймгийн Баянтүмэн сумын харъяат О.Батбилэгийн халзан азарга хурдалсан бол айргийн гуравт Сэлэнгэ аймгийн Баянгол сумын уугуул, аймгийн Алдарт уяач Т.Төрмөнхийн хурдан бор азарга хурдаллаа. Харин айргийн дөрөвт Монгол Улсын Тод манлай уяач Д.Бат-Эрдэнийн ажнай цавьдар азарга орж, Хөвсгөл аймгийн Цагаан-Уул сумын Д.Ганхуягийн хурдан хээр азарга айргийн тавд хурдаллаа.
“Их Хурд-8” наадмын шилмэл хурдан морины уралдаанд оролцохоор 32 хүлэг бүртгэгдсэнээс 30 хүлэг гарааны зурхайгаас хөдөлсөн бөгөөд айргийн тавд дараах уяачдын хурдан хүлгүүд хурдаллаа. Хөвсгөл аймгийн Шинэ-Идэр сумын харьяат Ц.Чимэдбавуугийн хүрэн халзан түрүү магнай хүртлээ. Мөн Хөвсгөл аймгийн Шинэ-Идэр сумын харьяат Ч.Цэрэнбатын хул аман хүзүүдэж, Төв аймгийн Баян сумын харьяат П.Энхмөнхийн хул айргийн гуравт хурдалж, Төв аймгийн Баян сумын харьяат Б.Нямжавын зээрд айргийн дөрөвт, Төв аймгийн Батсүмбэр сумын С.Лувсанбалданы халтар тавд оржээ.