УИХ-ын чуулганы өнөөдрийн хуралдаанаар Гаалийн албан татвараас чөлөөлөх тухай хуулийн төсөл батлагдлаа. Энэ хуулийн төслөөр импортын гурил, тэжээлийг гаалийн татваргүй оруулж ирэх асуудлыг зохицуулсан юм.

“Гаалийн албан татвараас чөлөөлөх тухай” хууль хэрэгжиж эхэлснээр:

- Засгийн газраас жил бүр шаардлагатай импортын гурилын хэмжээг тогтооно. Ингэснээр гадаадаас хямд, чанартай гурил орж ирнэ.

- Газар тариалангийн салбарыг бүрэн хамгаалалтад авч, зах зээлийн зарчмаар үнэ тогтооно.

- Жил бүр 100 мянган тонн улаан буудайг стратегийн нөөцөд авах, улаан буудайг биржээр худалдаалах боломжтой болно. Ингэснээр газар тариалангийн салбар бизнес зарчмаар хөгжих боломж нь бүрдэх юм.

Мөн Монгол Улсад зах зээлд борлуулагдаж буй гурилын үнэ нь хилийн цаана байгаа гурилын үнээс 3-4 дахин өндөр үнэтэй байгаа бөгөөд гурилын үнэ илүү давамгайлж, өндөр түвшинд хүрсэн гэж үзсэн. Гурилын үнэ нь инфляцийн 30-40 хувьд нөлөөлж байгаа бөгөөд энэ хууль хууль хэрэгжиж эхэлснээр гурилын үнэ буурч, инфляци дагаад буурах юм.

Цаашлаад макро, микро түвшиндээ үр өгөөжтэй гэж Засгийн газар үзэж байгаа. Иймд тариаланчид улаанбуудайн дотоодын хэрэгцээг хангаж илүү гарснаа экспортлох боломжийн эхлэлийг энэ хууль тавьж байгаа юм.