Израйль улсын Тель-Авив хотноо болсон олон улсын Физикийн 50 дахь олимпиад (IPhO-2019)-д 78 орны 364 хүүхэд, 150 гаруй дасгалжуулагч багш оролцож, оюун ухаанаараа өрсөлдөө. Монгол Улсад болсон физикийн олимпиадуудын дүнг нэгтгэн эхний таван байрт шалгарсан сурагчид тус олимпиадад оролцож, хоёр нь хүрэл медаль, нэг нь тусгай байрын шагнал хүртээд байна. Тодруулбал, "Сант" сургуулийн 12 дугаар ангийн сурагч Д.Итгэл, Монгол-Оросын хамтарсан Гуравдугаар сургуулийн сурагч Д.Хонгор нар хүрэл медаль, нийслэлийн Нэгдүгээр дунд сургуулийн 11 дүгээр ангийн сурагч Б.Цолмон тусгай байрын шагнал тус тус хүртэж, "Сант" сургуулийн 12 дугаар ангийн сурагч С.Бат-Оргил, нийслэлийн 11 дүгээр сургуулийн 12 дугаар ангийн сурагч С.Сайханбилэг нар амжилтаа ахиулсан юм. 

Улсын Физикийн олимпиадын хорооны дарга М.Ганбат “Олимпиадын бодлогын тавил, үнэлгээнд өнгөрсөн жилээс их өөрчлөлт орсон байна. Бидний ерөнхий боловсролын хөтөлбөр, сургалтад хэрэгжүүлэхийг хүсэж байгаа шинжлэх ухаанч эрэл хайлт, танин мэдэхүйн дээд түвшинд хийх даалгаврууд ирсэн. Туршилтын онолыг өөрөө боловсруулж, өөрөө төлөвлөх, өндөр нарийвчлалтай гүйцэтгэх, мета үйл ажиллагаа шаардсан, маш өндөр шалгууртай даалгавар ирсэн. Израйлийн Боловсролын яамны STEAM боловсролын хөгжлийн газар их сургуультайгаа хамтарч уг олимпиадыг зохион явуулсан нь дэлхийн хөгжлийн хурдыг харууллаа” гэв.
Манай улс сүүлийн 20 орчим жил олон улсын Физикийн олимпиадад оролцож буй бөгөөд энэ удаад МУИС-ийн багш, доктор Г.Мөнхбаяр, зөвлөх багш М.Ганбат, МУИС-ийн БУС –ийн дэд захирал, доктор Ц.Амартайван нарын ахлагчтай таван сурагч оролцов.

Х.Ананд