Амбулаторийн цогц тусламж үйлчилгээ, өдрийн эмчилгээ, сэргээн засах өдрийн эмчилгээ, архаг өвчний үеийн хэвтэн эмчлүүлэх эмийн тусламж үйлчилгээг Эрүүл мэндийн даатгалын ерөнхий газраас санхүүжүүлэхгүй болсон талаар эмнэлгүүд мэдээлсэн. Тэгвэл уг асуудалтай холбогдуулан Эрүүл мэндийн сайд Т.Мөнхсайхан мэдээлэл өгөв.

Тэрбээр, "Зарим улсын эмнэлгийн хувьд Эрүүл мэндийн даатгалын ерөнхий газартай хийсэн гэрээ нь хэтэрсэн асуудал байгаа. Эдгээр эмнэлэгтэй хэлцэл хийнэ. Улирлын нөхцөл байдлаас шалтгаалан улсын эмнэлгийн ачаалал нэмэгдэж байгаа. Тиймээс нэн шаардлагатай биш архаг хууч өвчлөлтэй хүмүүсийг хэвтэж эмчлүүлэх шаардлагагүй гэж үзсэн. Түүнээс нэн яаралтай тусламж үйлчилгээ авах боломжтой, үүний санхүүжилтэд эрсдэл үүссэн зүйл байхгүй. Монгол-Японы эмнэлэг болон бусад улсын эмнэлэг тусламж үйлчилгээгээ хэвийн үргэлжлүүлж байгаа. Тодруулбал, Эрүүл мэндийн даатгалаар үйлчилгээгээ үзүүлж байгаа гэж ойлгож болно. Бүх эмнэлэг ЭМД-ын сантай. ЭМД сан хязгаарлагдмал хөрөнгөтэй. Өөрөөр хэлбэл, тухайн жилийн төсөвтөө багтаан эмнэлгийн тусламж үйлчилгээгээ үзүүлдэг. Тиймээс ялангуяа томоохон эмнэлгүүдэд гэрээ хэтэрсэн зүйл бий. Тухайлбал, Гэмтэл согог судлалын үндэсний төв, Гуравдугаар эмнэлэг, УНТЭ, Монгол-Японы эмнэлгүүдийн ЭМДЕГ-тай хийсэн гэрээ дууссан. Гэсэн хэдий ч тухайн эмнэлгүүд Эрүүл мэндийн даатгалаар яаралтай тусламж үйлчилгээнүүдээ хэвийн  үзүүлж байгаа. ЭМД-ын санд 2023 оны байдлаар 1.93 их наяд төгрөг төвлөрсөн. 11, 12 сард зарцуулах ёстой мөнгийг эхний улирлуудад зарцуулсан учраас өнөөдрийн нөхцөл байдал үүссэн" гэлээ.