Өнөөдөр Сүхбаатар дүүргийн Засаг дарга М.Алтангэрэл халиа тошин үүсээд буй 18, 19, 20 дугаар  хорооны 8 байршилд ажиллалаа.

Энэ үеэр дүүргийн Менежер Э.Чинзориг, Засаг даргын Тамгын газрын Тохижилт, нийтийн аж ахуйн хэлтсийн дарга Т.Эдмон, тухайн хороодын Засаг дарга нар халиа тошин үүссэн байршлуудад авч хэрэгжүүлж буй ажлуудыг танилцуулав. Урьдчилан сэргийлэх, хариу арга хэмжээний хүрээнд Сүхбаатар дэвшил ОНӨААТҮГ-тай хамтран давхардсан тоогоор 40 орчим алба хаагч, 8 техник хэрэгсэлтэйгээр 360.000мкв орчим талбайд үүссэн нөхцөл байдалд тохируулан, шуурхай арга хэмжээ авч ажиллахын зэрэгцээ тухайн орчны айл, өрхөд сэрэмжлүүлэг мэдээлэл өгч байна. Тодруулбал, нийтдээ 4000мкуб мөсийг зөөж цэвэрлэн, 3,6км орчим урт мөсөн далан барьсан бөгөөд өнөөдрийн байдлаар 20 дугаар хороонд суваг татах, зарим хэсгийн мөсийг үргэлжлүүлэн зөөж, тээвэрлэж байна. Засаг дарга үүссэн нөхцөл байдал, авч хэрэгжүүлж буй арга хэмжээтэй танилцаж цаашид үүсч болзошгүй эрсдлийг цаг агаарын нөхцөл байдалтай уялдуулан тооцоолох, хаврын шар усны үерээс сэргийлэх ажлуудыг тодорхой болгох талаар үүрэг чиглэл өглөө. Мөн энэ үеэр иргэд, хог цэвэрлэгээний байгууллагуудаас ирүүлж буй саналын дагуу 19 дүгээр хороонд тохижилт бүхий хогийн цэг байгуулах байршлыг сонгов.