Япон улсын Шизокү мужийн Эдийн засаг аж үйлдвэрийн газар, Японы “Жетро” байгууллагын төлөөлөгчид болон Японы бизнес эрхлэгчид манай улсад энэ наймдугаар сарын 8,9-ний өдрүүдэд хүрэлцэн ирж Монголын бизнесийн төлөөллүүд уулзлаа. “Японы Шизокү муж болон Монгол бизнес эрхлэгчдийн бизнесийн хамтын ажиллагааны боломж” нэртэй уг семинар уулзалтыг ХХААХҮЯ, ЖДҮХсан, Экспорт олон улсын худалдааны төв (EITC) хамтран зохион байгуулав.

Манай улсын бизнес эрхлэгчид Японы зах зээлд нэвтрэхтэй холбоотой бизнесийн зөвлөгөөг авч, Монгол, Япон хоёр улсын эдийн засгийн хамтын ажиллагаа, бизнесийн боломжуудын талаар санал солилцсон юм. Монгол Улс Япон улстай эдийн засгийн түншлэлийн хүрээнд Японы зах зээлд бүтээгдэхүүнээ татваргүйгээр гаргах гэх мэт боломжууд нээгдсэн нь Монголын бизнес эрхлэгчдийн тус улсын зах зээлд гарах боломжийг улам нэмэгдүүлж байгаа юм.
Монгол Японы бизнес эрхлэгчдийн хамтын ажиллагааны боломж семинарт оролцсон аж ахуй нэгжүүд Японы зах зээлд гарах боломж гарц, бизнесийн үйл ажиллагаагаа өргөжүүлэхэд маш их тус дэм болсон амжилттай уулзалт боллоо гэдгийг онцлон хэлж байв.
Уг семинарын үеэр Шизокү мужийн эдийн засаг, аж үйлдвэрийн газрын Аж ахуйн нэгжийн бизнесийн үйл ажиллагааг дэмжих хэлтсийн орлогч дарга Такойки Гото “Шизокү мужийн эдийн засгийн орчин” сэдвээр илтгэл тавилаа.

Алдарт Фүжи уулын дунд орших Шизоки муж нь Япон улсын төвд орших таатай байрлалтай бөгөөд газар, далай, агаарын тээврийн дэд бүтцийн өндөр хөгжилтэй ачаа, тээврийн техник тоног төхөөрөмж, цахилгаан хэрэгсэл, химийн үйлдвэр, хүнс, ундаа тамхи зэрэг төрлийн бүтээгдэхүүнээр давамгай хөгжсөн муж юм. Тухайлбал, тус мужаас дэлхийд алдартай Yamaha, Suzuki, Kawai, Tamiya зэрэг брэнд төрөн гарсан. Шизокү мужийг Японы аж үйлдвэрийн шинэ эрч хүч төрдөг гэж үздэг бөгөөд шинэ технологи, ноу хаугаараа алдартай. Шизокү муж нь өнгөрсөн 2011 онд Дорноговь аймагтай харилцан хамтран ажиллах санамж бичиг байгуулж байсан ба өнгөрсөн хугацаанд бизнесийн салбарын төлөөллүүд туршлага судлан хамтран ажиллаж иржээ. Түүнчлэн ХХААҮЯ-тай хамтран ажиллах хүрээнд ЖДҮХсантай хамтран ажиллаж байгаа аж.
Дараагийн илтгэл нь Шизокү мужийн Жетро салбарын Гадаад худалдаа, мэдээллийн төвийн хэлтсийн дарга хатагтай И.Тэнжин “Япон Монголын эдийн засгийн харилцааны өнөөгийн байдал” сэдвээр илтгэл тавигдсан юм.

Япон-Монголын эдийн засгийн түншлэлийн хэлэлцээр байгуулагдсанаас хойш гадаад худалдааны дүнг гаалийн татвараас чөлөөлдөг болсон. Манай улсаас Японы зах зээлд гаргаж буй голлох бүтээгдэхүүнд уул уурхайн бүтээгдэхүүн болон хөдөө аж ахуй, газар тариалан, мал аж ахуйн бүтээгдэхүүнүүд гарч байна. 2018 онд Японоос Монгол руу хийсэн экспортын нийт дүн 57.2 тэрбум иен байгаа бол Монголоос хийсэн экспортын дүн 3.6 тэрбум иен байгаа юм. Энэ нь манай улсын аж ахуйн нэгжүүд тус улсын зах зээлд гарах бүрэн боломжтойг харуулна. Японы гадаад худалдааг дэмжих үйл ажиллагаа явуулдаг “Жетро” байгууллага нь дунд болон жижиг дунд үйлдвэрийн гадаад зах зээл дээрх үйл ажиллагааг дэмжин start up компанийг дэмжиж ажилладаг.

Тус семинарт оролцсон аж ахуйн нэгжийн төлөөллийн нэг болох зөгийн бал үйлдвэрлэдэг “Сараана” ХХК-ийн менежэр Х.Сувд ярихдаа “Бизнес эрхлэгчдийн хамтын ажиллагааны боломж семинарт манай компани оролцсоноор бизнесийн зөвлөгөө маш сайн авч, Японы зах зээлд гарахад ямар стандартыг барих вэ юуг анхаарах вэ гэдгийг сайн мэдэж авлаа. Цаашид олон улсын экспод оролцох, гадаад зах зээлээ өргөжүүлэх боломжийг олж харлаа. Япон улсаас манай улсад төлөөлөгч нар ирж сонирхсон компани тус бүрт бизнесийн үнэт зөвлөгөөг өгч байгаад талархал илэрхийлье. Уг семинарыг зохион байгуулсан “Экспорт олон улсын худалдааны төв” ( EITC) байгууллага нь Монголын аж ахуйн нэгжүүдийг гадаад зах зээлд гарахад гол гүүр гарц болж байна.

Б.ОДМАА