Шинэхэн аварга Э.Оюунболдыг допинг хэрэглэсэн талаарх мэдээлэл нэлээд шуугиан тариад байна. Энэ талаар анх Үндэсний бөхийн салбар хороо мэдээлэл хийсэн бөгөөд Монголын үндэсний бөхийн холбоо өчигдөр тамга тэмдэгтэй бичиг дэлгэсэн юм. Үүний зэрэгцээ Улсын аварга Э.Оюунболдод хүндэтгэл үзүүлэх “Аварга” цолны мялаалга наадмын тов гарсан нь бүр ч сонирхолтой. Хэрэг явдлыг тодруулж үзвэл, хоёр тамгатай, хоёр тэргүүнтэй бөхийн холбооны маргаан хурцдаж, түрүү бөхийг оролддог болжээ гэх хардлага төрөхөөр байна. Түүнчлэн, нэг холбоог нь Монгол Улсын дархан аварга, УИХ-ын гишүүн Б.Бат-Эрдэнэ, нөгөө холбоог нь “Гацуурт” компанийн захирал Л.Чинбат тэргүүлдгийг бөхдөө хайртай монгол түмэн андахгүй. Тэгвэл энэ жилийн наадмын түрүү бөх болсон "аварга Э.Оюунболдоос допинг илэрлээ" гэх мэдээллийг Л.Чинбатын тэргүүлдэг холбоо Баяр наадам зохион байгуулах комиссоос урьтаж, мэдээлсэн ажээ. Энэ талаар улсын харцага Ц.Магалжаваас тодруулахад, “Бид энэ талаар ямар нэгэн байр суурь илэрхийлэхгүй. Баяр наадмыг зохион байгуулах комисс болон Допингийн эсрэг үндэсний төв албан ёсоор мэдээлэл хийгээгүй байгаа” гэсэн юм.