Завхан аймгийн Ардчилсан намын дарга А.Булгантай ярилцлаа.

-Сайн байна уу. Сайхан зусч байна уу?
-Сайхан зусч байна. Энэ жил манай нутагт нар хур тэгширсэн сайхан зун болж өнгөрлөө.

-Таны хувьд Ардчилсан намын даргын ажлыг хүлээж аваад удаагүй. Аймаг орон нутагтаа ямар ажил хийж хэрэгжүүлье гэж бодож байна вэ?
-Ардчилсан нам Завхан аймагт өнөөдөр засаглаж байна. Энэ ч утгаараа бид бүхэн намын үзэл баримтлал, бодлого, мөрийн хөтөлбөрийн дагуу олон ажлыг хийж хэрэгжүүлж байгаа. Хоёр УИХ-ын гишүүнтэй гэдэг бол бидний давуу тал. З.Нарантуяа, Я.Санжмятав хоёр гишүүн маань маш хариуцлагатай, чамбай, нэр хүндтэй хүмүүс. Үүнээс гадна аймгийн засаг дарга маань маш чадварлаг удирдагч хүн. Гурвуулаа намын дарга хийж байсан, нутаг орноо гэсэн сэтгэлтэй, асуудлаа мэддэг хүмүүс. Тийм болохоор цаашид бидний төлөвлөж буй олон ажил санасанчлан бүтнэ гэдэгт итгэлтэй байна.

-2016 оны буюу сүүлчийн сонгуулиас хойш Завхан аймагт хэрэгжсэн, олон түмэнд хүрсэн хамгийн бахархалтай бүтээн байгуулалт, төсөл хөтөлбөрийнхөө талаар хуваалцана уу?
-Манай нам энэ хугацаанд ард иргэдийнхээ ухамсар, оюун бодолтой тулж ажиллахыг илүү чухалчилсан. Энэ зорилгын үүднээс “Оюунлаг Завханчууд” хөтөлбөрийг хэрэгжүүлсэн. Үүний ачаар ард иргэд маань маргаашийн төлөөх сонголтоо ходоодоороо хийхээргүй болсон гэдэгт итгэлтэй байна. Мөн бид “Хэрэглэгч аймгаас-Үйлдвэрлэгч аймаг” болох зорилго тавьж ажилласан. Энэ зорилтын хүрээнд өрх бүрийг үйлдвэрлэгч болгох зорилгоор 2016 оноос эмэгтэйчүүдэд зориулсан гар урлалын ахисан шатны сургалтуудыг зохион байгууллаа. Сургалтад 3000 шахам эмэгтэйчүүд оролцож, 24 суманд өрхийн үйлдвэрлэлийг эхлүүлсэн. Аймгийн Засаг дарга маань “Үндэсний үйлдвэрлэлээ дэмжих тухай” захирамж гаргаж, үндэсний үйлдвэрлэгчдийнхээ брэнд бүтээгдэхүүнийг борлуулах “Хамтын хүч-Хөгжлийн гарц” төвийг шинээр нээн ажиллуулж байгаа. Орон нутгийн үйлдвэрлэл эрхлэгчдийг тал бүрээр дэмжин ажилласны үр дүнд өрхийн үйлдвэрлэлийн хэмжээ 20 хувиар өссөн. Түүнчлэн “Хамтын хүч-хөгжлийн гарц” төвөөр дамжуулан 70 гаруй сая төгрөгийн борлуулалтыг хийгээд байгаа нь чамлахааргүй амжилт гэж бодож байна.