Г.Хавчуур гуай “Комори”-той танилцаж, “соёлыг гайхав”. Тэрбээр анх 1963-онд Улсын хэвлэлийн комбинатад ажиллаж байсан хүн. Түүнийг хэвлэх үйлдвэрт ажиллаж байхад гар ажиллагаа ихтэй. Өрөх цехэд нь арав гаруй хүн ажилладаг. Үсгүүдийг багцлаад, үг болгодог байжээ. Сонин, номуудын эх бэлтгэхдээ тугалгаар цутгасан үсгүүдийг мөр мөрөөр нь өрж бүтээдэг байсан гэнэ. Дардас гарсны дараа тулгаж уншдаг байжээ. Компьютерийн технологи нэвтэрсний дараа гар ажиллагаа халаагаа өгсөн. “Адмоныхон дөнгөж 2019 онд үйлдвэрлэгдсэн цоо шинэ Комори хэмээх том хэвлэх машин оруулж ирсэн байна. Өмнө нь манайхан хуучин, жижиг хэвлэх машин оруулж ирдэг байлаа. 1995 онд намайг Японд явж байхад тэнд ч ийм машин байгаагүй. Өнөөдөр “Адмон”-ыхон хэвлэлийн техник технологиороо тэргүүлэгч “Комори”-гийн хэвлэх машиныг Монголдоо оруулж ирж, хэвлэлийн салбарт шинэчлэл хийлээ. Монгол Улс аль ч хөгжилтэй улсаас дутахааргүй хэвлэх үйлдвэртэй боллоо” хэмээн хэвлэх үйлдвэрийн түүхийг өгүүлэгч Г.Хавчуур гуай хуучилсан.

“Адмон” группийн ерөнхий захирал Р.Энхбат “Дэлхий нийтээр уншиж байгаа номыг бид хоёр сар гаруйн дотор орчуулж, хэвлэлийн өндөр түвшинд монгол уншигчдадаа хүргэж байна. Улам олон номыг дэлхийн хүмүүстэй зэрэгцэн орчуулж, хэвлэхэд үйлдвэрийн хүчин чадал маань дутахааргүй боллоо. Номын дэлгүүрээ гоё сайхан номоор дүүргэх, номын тухай яриа өрнүүлэхийн цаана хэвлэх үйлдвэр байдаг юм шүү” гэлээ. Нээлтийн ёслолд хүрэлцэн ирсэн “Комори”-гийн Солонгос дахь салбарын захирал Won sik Jung хэлэхдээ “Коморигийн G40 загварын энэхүү хэвлэлийн машин нь “ногоон” гэдгээрээ хэвлэлийн салбарт танигдсан юм. Хаягдал бага гаргадаг, эрчим хүч хэмнэдэг давуу талтай. Удирдлагын систем нь ухаалаг, олон төрлийн бүтээгдэхүүнийг зардал багатай хэвлэдэг хэмээн магтсан. Хүчин чадлын хувьд ердийн хэвлэх машинаас 20-30 хувийн илүү бүтээмжтэй, цагт 16500 хуудас хэвлэдэг гэнэ шүү. Хэвлэлийн хавтанг солихдоо болон цэвэрлэгээг автоматаар хийдэг шидтэй ажээ.

 Энд хэвлэх үйлдвэрийн түүхтэй танилцаж болохоор байлаа. Комори машин аварга эд аж. Сүн хийтэл хурдтай ажиллах агаад дуу чимээ багатай, ажилсаг мөртлөө дөлгөөн эд юм гээч. Шинэхэн аваргын цаад талд 2001 онд орж ирсэн Rapida 105 машин дүнхийх агаад одоо ч үүргээ сайн гүйцэтгэж буй. Харин тус хэвлэх үйлдвэрийн анхны хэмээх тодотголтой Heidelberg-GTO-52 хэмээх товхийсэн машин аваргуудын дэргэд бяцхан харагдах ч цоглог ажиллах агаад үүгээр падан, бичиг баримт хэвлэх болжээ. 

Шинэ хэвлэх машин Монголд хөл тавьсан баярыг зохиолчид, түүхчид, уншигчид, үйлдвэрлэгчид хамтдаа тэмдэглэсэн нь ийм буюу.