-Сонгуулийн хуулийг УИХ баталлаа гэхэд Үндсэн хуулийн Цэцэд очоод унах байх гэсэн яриа гараад байна. Энэ талаар та ямар байр суурьтай байна вэ?
-Хууль хэрхэн батлагдсанаас шалтгаалж Үндсэн хуулийн Цэц асуудалд хандана шүү дээ. Тэгэхээр урьдчилаад тэгнэ ингэнэ гэж хэлэх бололцоогүй юм. Бид найм дахь удаагаа УИХ-ын сонгуулийг явуулах гэж байна. Өмнөх долоон сонгууль бүгд өөр өөр хуулиар явуулж байсан. Тухайлбал, дөрвөн удаа мажоритар системээр сонгууль явуулсан. Гурван удаа пропорцианаль систем агуулсан хуулиар сонгууль явуулж байсан удаатай. Сонгуулийн системтэй холбоотой маргаан үүссэн. Үүнийг Үндсэн хуулийн Цэц хэлэлцээд мажоритар буюу шууд нэр дэвшсэн хүний нэрийг дугуйлах систем  нь Үндсэн хуультай нийцнэ гэж үзсэн. Өнгөрсөн Сонгуулийн хууль жижиг 76 буюу мажоритар системтэй юм. Энэ удаагийн сонгууль бас л мажоритар системд суурилж явуулах хуулийн төсөл өргөн бариад байгаа. Мажоритар систем дотор таван хувилбар бий. Тухайлбал, жижиг 76, улс нэг тойрог, тойргийг бүсчлэх, 50:26, эсвэл 60:16 гэсэн холимог мажоритар систем байгаа. Энэ хууль батлагдсанаар ямар үр дагавар гарахыг Сонгуулийн ерөнхий хороотой хамтарч тооцож үзэх ёстой.  Мөн Үндсэн хуулийн Цэцэд бас асуудал тавина. Хууль батлагдсанаар Үндсэн хуультай ямар нэг байдлаар зөрчил үүсэх эсэхийг Сонгуулийн хуулийн хэлэлцүүлгийн явцад  тодруулах учиртай.
-Сонгуулийн хуульд яллагдагчаар татагдсан хүнийг нэр дэвшүүлэх үү. Хэрэв УИХ-ын гишүүн болчихвол хуулийн хамгаалалтад ордог тал бий?
-Гэм бурууг нь шүүхээр тогтоогоогүй хүнийг  гэм буруутай гэж үзэж болохгүй. Өнгөрсөн 30 жилийн хамгийн том ололтын нэг шүү дээ. Хэнийг ч сэрдэх, сэжиглэх, асууж тодруулах эрх монголын нийгэмд бий. Тэгэхээр асуудлыг  асууж тодруулж шийдээгүй байхад өмнө нь дүгнэж шийдэж болохгүй. Хэрэв эрүүгийн гэмт хэрэгт холбогдсон нь тогтоогдоод прокурор, хуулийн байгууллагаас хэрэг бүртгэлт хийгдээд явж байгаа бол нэр дэвших эрх нь хязгаарлагдаж байх ёстой.
-Таны нэр Засгийн газрын тусгай сангуудаас зээл авсан асуудалд холбогдсон. Таныг хуулийн байгууллагаас шалгаж байгаа юу?
-Миний хувь эзэмшиж байсан компани ХХААХҮЯ-ны төсөлд хамрагдаад зээл авсан байсан. Би тэгээд энэ нь зохисгүй зүйл гэдгийг хүлээн зөвшөөрч зээлийг нь бүрэн барагдуулсан. Одоо надтай холбоотой ямар нэг өр зээлтэй асуудал байхгүй. Энэ асуудал жил зургаан сарын өмнө дууссан асуудал.