Улсын хэмжээнд нийт 2087 хэсэг дээр санал хураалт үргэлжилж байгаа бөгөөд хэвийн үргэлжилж байна гэж СЕХ-оос мэдээллээ.

Сонгуулийн санал хураалтын өдөр цахимаар сурталчилгааны шинжтэй зүйл явуулах, саналын хуудасны зургаа нийтлэх зэргийг хориглодог гэж СЕХ-ны Хууль зүйн хэлтсийн дарга Д.Бат-Эрдэнэ хэллээ.

СЕХ-ны хууль зүйн хэлтсийн дарга Д.Бат-Эрдэнэ "Сонгуулийн сурталчилгаа албан ёсоор зогссон. Сурталчилгаа албан ёсоор хаагдсан учраас нэр дэвшигчийн зурагтай хувцас өмсөхийг хориглоно. Сонгуулийн хууль тогтоомж зөрчвөл Харилцаа холбооны зохицуулах хороо ажиллаж байгаа бөгөөд олон гомдол, зөрчлүүдийг арилгаж ажиллаж байна. Зарим иргэд мэдээлэл муутай байгаагаас ийм үйлдлүүд гарч байна. Сонгуулийн хууль тогтоомж зөрчвөл 36 төрлийн зөрчлийг 9 эрх бүхий байгууллага шалгаж, шийдвэрлэнэ. Мөн саналаа өгсөн сонгогч хэн нэгнийг дэмжсэн эсвэл дэмжээгүй гэдгээ илэрхийлэн саналын хуудсан дээрх зургийг авч нийтлэх нь хуулиар хориглосон үйлдэл. Тиймээс иргэд үүнд анхааралтай хандах ёстой. Дэмжсэн эсвэл дэмжээгүй гэдгээ илэрхийлэх хэлбэр нь саналын хуудсанд саналаа өгөх юм. 

Түүнчлэн сонгуулийн сурталчилгаа зогссон байхад ямар нэг байдлаар нам эвслийн далбаа зургийг нийтлэх нь хууль  зөрчиж байгаа хэлбэр болно. Энэ асуудалд Харилцаа холбооны зохицуулах хороо хяналт тавина. Энэ талаар гомдол ирж, хаах арга хэмжээ авч байна. Санал өгсөн саналын хуудасны зургийг авч олон нийтэд мэдээлэх нь хуулиар хориглосон үйлдэл" гэв. 

Ерөнхийлөгчийн сонгуулийн тухай хуульд

30.Сонгогч нь:
30.1.санал авах байрнаас саналын хуудас авч гарсан;
30.2.саналын хуудсанд тэмдэглэсэн саналаа болон бусад сонгогчийн тэмдэглэсэн саналыг баримтжуулан зураг авсан, дүрс бичлэг хийсэн, шууд дамжуулсан, бусдад харуулсан;
30.3.саналын хуудсанд зориулалтын бус үзгээр санал тэмдэглэсэн;
30.4.аль нэг нэр дэвшигчийн төлөө санал өгөх, эсхүл өгөхгүй байхаар мөнгө, эд зүйл шаардсан, шаардаж авсан бол хүнийг арван мянган нэгжтэй тэнцэх хэмжээний төгрөгөөр торгоно.