Засгийн газар, Монголбанк хамтран жилийн 8 хувийн хүүтэй ипотекийн зээлийг 2013 оны зургаадугаар сараас олгож эхэлсэн. Түүнээс хойш 2020 он хүртэлх хугацаанд нийт 100 мянган өрхөд 5 их наяд төгрөгийн ипотекийн зээл олгожээ.

Тус зээлийг авсан иргэд сар бүр өрхийн орлогынхоо 45 хүртэлх хувь буюу дунджаар 700 гаруй мянган төгрөгийг 30 жилийн турш төлж байна. Гэтэл иргэдийн төлж буй зээлийн эргэн төлөлтөөс шимэгчилж суудаг “Монголын ипотекийн корпораци" компанитай холбоотой ноцтой асуудлыг Шадар сайд С.Амарсайхан өнөөдөр олон нийтэд дэлгэлээ.

Тэрбээр “Ипотекийн зээлийн хүү 8 хувь байхад Монголбанк арилжааны банкуудад 4 хувийн хүүтэй зээл олгодог байсан. Монголын Ипотекийн Корпораци Орон Сууцны Санхүүжилтийн Компани (МИК ОССК) ХХК дийлэнх хувийг арилжааны банкууд эзэлдэг, төрийн мэдлийн хувь бараг байхгүй.

Ипотекийн зээл өнөөдөр 6%-ийн хүүтэй болсон хэдий ч МИК зээлийн шимтгэл гэж 1.6 орчим хувийг авдаг. Санхүүжилтийн эх үүсвэр нь Монголбанкнаас 1%-ийн хүүтэй гардаг. Өөрөөр хэлбэл, Монголбанкнаас гарсан санхүүжилтийг аль нэг банкаар дамжуулаад МИК гэрээ хийж иргэдэд өгсний төлөө хэдэн хувийн хүү нэмж авдаг тогтолцоо байж болохгүй. 6%-аас 1.6%-ийг нь МИК шимтгэл байдлаар авч байна гэсэн үг. 100% хувийн ААН зах зээлийн зарчмаар санхүүжилтээ босгоод иргэдэд ипотекийн зээл олгодог байсан бол өөр хэрэг.

Өмнө нь ипотекийн зээлийн нийт санхүүжилтийн 90 хувийг Монголбанк гаргадаг байсан бол одоо арилжааны банкууд өөрсдийн эх үүсвэрээсээ 40 хувийг гаргаж байна. Одоо ковид цар тахлын нөлөөллөөр зээлийн олголт хумигдсан бөгөөд дээрх асуудлаас үүдэж МИК-ыг татан буулгах, эсвэл төрд шилжүүлэх тухай яриагүй гэдгийг онцоллоо. Зохион байгуулалт, бүтцээ эргэж хар. Хяналтаа сайжруулахыг шаардах юм байна.