Б.Эгшиглэн

Эдийн засагч Б.Дөлгөөнд хандаж, цар тахалтай тэмцэх, эдийн засгийг хамгаалах үүднээс гаргасан Засгийн газрын багц шийдвэрүүд нь ямар эх үүсвэрээс санхүүжиж буй, энэ талаарх байр суурийг нь сонирхсон юм. Б.Дөлгөөн ийнхүү хариуллаа:
-Ерөнхий сайд У.Хүрэлсүх тавдугаар сарын 6-нд хийсэн мэдэгдэлдээ нийт 793 тэрбум төгрөг зарцуулахаар, үүний 547 тэрбум төгрөгийг хүүхдийн мөнгөнд зарцуулахаар шийдвэрлэсэн. Тэгвэл энэ мөнгө яг хаанаас хэмнэгдэж байгааг тайлбарлахдаа гадаад зээлийн зардлыг хойшлуулах, төсвийн хэмнэлтээс гарсан санхүүгийн эх үүсвэрээр хэмээн тайлбарласан. Тэгвэл 2020 оны төсөвт Засгийн газар 950 тэрбум төгрөгийг зээлийн үйлчилгээний төлбөрт төлөхөөр тусгажээ. Үүнийг хойшлуулахад хангалттай санхүүжилтийн эх үүсвэр гарч ирнэ. Харин сөрөг үр дагавар юу байж болох вэ гэвэл нэгэнт төлөх ёстой гадаад зээлийн үндсэн болон хүүгийн өр төлбөрүүд хойшилсноор гадаад өр нэмэгдэнэ.
Гэтэл үүнийг өр төлбөрийг нэмэгдүүлэхгүйгээр шийдэх боломжтой. Засгийн газар төсөвт өртөг нь 540 тэрбум төгрөг болох долоон төслөө хойшлуулах боломжтой. Үүнд:
1. Үндэсний урлагийн их театрын барилга (152 тэрбум)
2. Байгалийн түүхийн музейн барилга (94 тэрбум/)
3. Үндэсний төв цэнгэлдэх хүрээлэн (80 тэрбум)
4. Дуурь бүжгийн эрдмийн театрын барилгын зураг төсөв боловсруулах, барилгыг шинэчлэх ажлыг эхлүүлэх (55 тэрбум)
5. Төв номын сангийн барилга (52 тэрбум)
6. Чингис хаан музейн барилга (53 тэрбум)
7. Улсын драмын эрдмийн театрын барилгын зураг төсөв боловсруулах, барилгыг шинэчлэх ажлыг эхлүүлэх (52 тэрбум)
Нийтдээ 540 тэрбум төгрөг болно. Нөгөө талаас нэг сая 120 мянган хүүхэд сардаа 100 мянган төгрөг авахад нэмэгдэл 547 тэрбум төгрөг шаардлагатай гээд бод доо. Ингэж шийдсэн тохиолдолд музей, хөшөө, барилгаа түр азнаад, зээлээ төлөөд ч болтугай хүүхдийн мөнгөө өгөх боломжтой.

ЭХ СУРВАЛЖ: "АРДЧИЛАЛ ТАЙМС" СОНИН