Их Британийн Засгийн газрын тэргүүн Борис Жонсонг эсэргүүцэгчид түүний өөдөөс хашгиралдан, шүгэлдэж угтсанаас болоод Brexit-ийн хэлэлцээрийн үр дүнгийн талаар Люксембургийн Ерөнхий сайд Ксавье Беттельтэй хийх гэж байсан хэвлэлийн бага хурлаа орхиход  хүрлээ  гэж Белгийн VRT телевиз дамжууллаа.
Хэвлэлийн мэдээлснээс үзвэл хоёр ерөнхий сайдын хэлэлцээр болсон Засгийн газрын байрны гадаа Их Британийг Европын холбооноос гарахыг эсэргүүцсэн хэдэн арван хүн цугларсан байсан гэнэ. Тэд Жонсоныг уулзалтаас гарч ирэхэд нь “шившиг” хэмээн хашгиралдаж, шүгэлдэж угтжээ.
Хоёр ерөнхий сайд хамтраад хэлэлцээрийн үр дүнгийн талаар хэвлэлийнхэнд мэдээлэх байсан ч ВРТ телевизийн мэдээлснээр бол К.Беттель сэтгүүлчидтэй ганцаараа ярилцжээ.

 

 

Люксембургийн Ерөнхий сайд К.Беттельтэй уулзахаасаа өмнө Борис Жонсон  Еврокомиссын тэргүүн Клод Юнкертэй хэлэлцээ хийсэн ч ямар ч үр дүнгүй өндөрлөжээ. Еврокомиссын мэдээлснээр бол Европын холбоо 2018 оны арваннэгдүгээр сарын 25-нд Брюссель, Лондон хоёрын тохиролцсон хэлэлцээрээр хамтын нийгэмлэгээс гарах гэсэн Их Британийн саналыг хүлээн аваагүй гэнэ. Харин Еврокомисс Британийн талтай хэлцэлд хүрэхийн тулд “24/7 гэсэн дэглэмээр ажиллаж”, аравдугаар сарын 17-18-нд болох  дээд хэмжээний уулзалтаар тохиролцохоор найдаж байгаа юм байна.
Их Британийн Ерөнхий сайдын алба болохоор Люксембургт болсон уулзалтын үр дүнгээр Европын холбоотой Brexit-ийн хэлэлцээрээ идэвхжүүлэн, өдөр тутам харилцан зөвлөлдөж байна гэсэн байна.

 

 

Юнкер болон Жонсон хоёрын уулзалт нь үндсэндээ гацаанд ороод байсан Brexit-ийн хэлэлцээрийг урагш ахиулах гэгээ авчрах ёстой байлаа. Талууд “бэкстоп” буюу Умард Ирланд түр зуур Европын холбооны гаалийн холбооны бүрэлдэхүүн болон нэгдсэн Европын зах зээлд байгаа тэр хувилбарын талаар ярилцах гэж байсан юм. Гэтэл Их Британи “бэкстоп” хувилбарыг хүлээн зөвшөөрөөгүй болохоор Брюссель ч Ирландад хөдөө аж ахуй, болон хүнсний бүтээгдэхүүн оруулах гаалийн нэгдсэн дэглэмийн талаар Лондонд өөр ямар нэгэн хувилбар санал болгоогүй байна.
Их Британи Европын холбооноос гарах бичгийн хүсэлтээ илгээснээс хойш хоёр жилийн дараа буюу 2019 оны гуравдугаар сарын 29 гэхэд гарах ёстой байсан ч Британийн парламентын Нийтийн танхимын гишүүд Тереза Мэйгийн Засгийн газраас Брюссельтэй хийх Brexit-ийн нөхцөлийн тухай хэлэлцээрийн төслийг гурван удаа буцаасан юм. Ингэснээр Европын холбооноос гарах асуудал дөрөв, тавдугаар сар болоод эцэст нь аравдугаар сарын 31 болж хойшлоод байгаа юм. Ерөнхий сайд Тереза Мэй огцорсон ч хэлэлцээр гацаанаас гарч чадахгүй өнөө хүрч оронд нь томилогдсон Ерөнхий сайд Борис Жонсон  ямар ч байсан, хэлэлцээртэй хэлэлцээргүй Их Британи аравдугаар сарын 31 гэхэд Европын холбоог орхино гэж амлаад байгаа юм.