Оросын үйлдвэрлэгчид хиймэл махаар хийсэн котлет бүтээснээ албан ёсоор зарласан байна. Энэ ажилд хоёр жилд нийтдээ 900 мянган рубль зарцуулжээ. 

Москвагийн “Очаковскийн хүнсний орцны комбинат” хүнсний зориулалттай хиймэл мах Орост анх удаа үйлдвэрлэлээ гэж мэдэгдсэнийг “Интерфакс” агентлаг дамжуулжээ. Хэд хэдэн удаагийн цуврал туршилтын үр дүнд гаргаж авсан хиймэл махаар котлетод зориулсан 40 грамм жинтэй анхны хиймэл мах гаргаж авчээ. “Энэ ажилд бид сүүлийн хоёр жилийг 900 мянган рубль зарцуулж байж үр дүнд хүрлээ” хэмээн комбинатын хэвлэлийн мэдээлэлд дурджээ.

Үүний тулд комбинат эсийн инженерчлэлийн тусгай лаборатори байгуулсан гэнэ. “Ийн хиймэл мах гаргаж авсан нь мах үйлдвэрлэлийн чиглэлд асар их дэвшил” хэмээн төслийн удирдагч, профессор Николай Шимановский “Интерфакс” агентлагт ярилцлага өгөхдөө хэлсэн байна. Тэр бас “Ургамлын уураг ялангуяа улаан буудай, бурцагнаас гаргаж авч байгаа хиймэл мах нь бидний үзэж байгаагаар бол өнөөгийн ертөнцөд махыг нь авахын тулд амьд биетийн амийг таслахаас татгалзах боломж бүрдүүлж байгаа юм” гэжээ.

Зохион бүтээгчид ийм хиймэл мах 2023 он гэхэд худалдаанд гарч оросын хэрэглэгчдэд хүрнэ гэсэн байна. Өнөөдөртөө хиймэл мах харьцангуй өндөр өртөгтэй, кг нь ойролцоогоор 5800 рубль байгаа гэнэ. Харин таван жилийн дараа гэхэд үхрийн хиймэл мах хэрэглэгчдэд 800 рублиэр хүрнэ гэж комбинатын шинжээч хэлсэн байна.

Хэвлэлийн мэдээллээс үзэхэд хиймэл мах нь хүнд ямар ч хор нөлөөгүй, боловсруулан ариутгаж хадгалсан тохиолдолд жирийн махнаас хоёр дахин урт хугацаагаар хадгалж болох гэнэ. Хиймэл мах гаргаж авахын тулд хоёроос гурван өдрийн настай тугалын булчингийн эсээс үл ялигхан хэсэг хэрэглэдэг байна.