Орос улс Токиотой хамтын ажиллагаагаа өргөжүүлэхийн тулд 1945 онд Зөвлөлт холбоот улсаас Японы эсрэг явуулсан цэргийн ажиллагааныхаа төлөө буруугаа хүлээх ёстой гэж Японы сэтгүүлч Ресуке Эндо “Sankei Shimbun” сонинд бичсэн өгүүлэлдээ дурдсан байна. Зохиогч японы цэргийн олзлогдогсодтой ЗХУ-ын харьцаж байсныг “төрийн гэмт хэрэг” гэж нэрлээд Зөвлөлтийн лагериудад японы олон хоригдол үхэж, сураггүй алга болсон гэжээ.

Европт дайн дуусч, Герман бууж өгснөөс хойш хоёроос гурван сарын дараа Сахалины өмнөд хэсэг, Курилын арлуудыг ЗХУ-д эргүүлэн өгөх нөхцөлтэйгөөр холбоотнууд Японы эсрэг дайн зарлах хэлэлцээрт Гитлерийн эсрэг эвслийн гүрнүүдийн тэргүүн Иосиф Сталин, Франклин Рузвельт, Уинстон Черчилль нар Ялтын бага хурлын үеэр 1945 оны хоёрдугаар сард гарын үсэг зурсан юм. Улмаар 1945 оны найм, есдүгээр сарын эхээр Зөвлөл холбоот улс Манжуурын стратегийн давшилт эхлүүлж Японы Квантуны армийг бүрэн устгаж, зүүн хойд болон хойд Хятадын мужууд, Ляодуны хойг, Солонгосыг чөлөөлөн Азид байсан японы армийн цэрэг эдийн засгийн томоохон баазуудыг устгасан. Зөвлөлтийн цэргийн энэ ажиллагааны үрээр 1904-1905 оны Орос-Японы дайны төгсгөлөөр Токиогийн эзэмшилд очоод байсан өмнөд Сахалин, Квантуны суж, Порт-Артур болон бүүр өмнө 1875 онд Японы авсан Курилын арлууд, Симорын гэрээгээр 1855 онд японд очоод байсан Курилын өмнөх Кунашар, Итуруп, Шикотан арлуудаа Зөвлөлт холбоот улс албан ёсоор өөрийнхөө газар нутагт эргүүлэн авсан юм. Өмнөд Курилын арлуудыг энхийн хэлэлцээрийн замаар эргүүлэн өгөхийг Токио өнөө болтол шаардсаар байдаг юм.