Вашингтон, БНАСАУ-тай харилцах харилцаандаа дайсагнасан бодлогоосоо бүрэн татгалзахгүй үргэлжлүүлсээр байгаа нөхцөлд АНУ-тай шинээр хэлэлцээ хийх боломжгүй гэдгээ Пеньян мэдэгдсэн байна. Энэ талаар БНАСАУ-ын Ази Номхон далайн бүс нутагт энх тайван тогтоох хороны дарга Ким Ён Чолын мэдэгдсэнийг Солонгосын мэдээллийн төв агентлаг мягмар гарагт нийтэлжээ.
“АНУ боломжтой үе бүхэнд цөмийн зэвсэг хураах хэлэлцээрийн тухай ярьдаг боловч, яриа нь өнөө болтол хэрэгжихгүй, харин ч БНАСАУ-тай харилцах харилцаандаа Солонгосын хойг дахь цөмийн зэвсгийн асуудлаар дайсагнасан бодлогоо бүрэн өөрчлөхгүй, татгалзахгүй байгаа юм. Тэгэхээр бидний хувьд АНУ-тай хэлэлцээрийн ширээнд суух гэж яарах хэрэг байхгүй” гэж Ким Ён Чол хэлжээ.
Түүнийхээр бол Өмнөд Солонгостой хамтран цэргийн сургууль хийх талаар АНУ-ын Батлан хамгаалах яамны саяхны шийдвэр нь л гэхэд БНАСАУ-ын хувьд хангалттай баримт. “Бид Өмнөд Солонгостой хамтарсан цэргийн сургууль хийхээ болихыг, ер нь ийм сургуулилт хийхээс бүрэн татгалзахыг АНУ-аас шаардаж байна. Энэ хээрийн сургууль нь Солонгосын хойгт энхтайван, аюулгүй байдал хангах, асуудлыг шийдвэрлэх дипломат хүчин чармайлтад ямар ч тус болохгүй” гэж Ким Ён Чол тэмдэглэсэн байна.

Ким Ён Чолынхоор бол Солонгосын хойгийг цөмийн зэвсэггүй болгох асуудлаар цаашид хэлэлцэх эсэх нь “АНУ, БНАСАУ-ын харилцан итгэлцэл, бүгд найрамдах улсын хөгжил цэцэглэл, аюулгүй байдалд заналхийлсэн аюулыг бүрэн зайлуулсан цагт” л бодитой хэрэгжинэ гэж Ким Ён Чол онцолжээ.
Энэ оны хоёрдугаар сард Ханойд болсон хоёр орны тэргүүний дээд хэмжээний уулзалт амжилтгүй тасалдсаны дараа зургадугаар сарын 30-нд АНУ-ын Ерөнхийлөгч Дональд Трамп, БНАСАУ-ын Төрийн зөвлөлийн дарга Ким Чен Ун нар хоёр солонгосын хилийн Панмунжомд уулзахдаа цөмийн зэвсгийн талаарх хэлэлцээрээ ажлын түвшинд сэргээхээр тохиролцсон юм.
Энэ тохиролцооны хүрээнд АНУ, БНАСАУ-ын төлөлөөгчид аравдугаар сарын 5-нд Стокгольмд уулзаж хоёр талын харилцааг хэвийн болгох асуудлаар ярилцаж эхэлсэн ч бүтэлгүйтэж тасарсан юм. Хэлэлцээр тасалдсан тухайд Америкийн тал өөрийнхөө байр суурь ямар байсныг сайн бодох хэрэгтэй, үүнээс л болж хэлэлцээр тасалдсан гэж БНАСАУ-ын төлөөлөгчдийн тэргүүн Ким Мён Гиль хэлсэн бол АНУ-ын Төрийн департамент энэ үнэлэлтийг зөвшөөрөхгүй уулзалт бүтээлч болсон гэж байгаа юм.