Бразилийн ерөнхийлөгч Жаир Болсонару Шведийн байгаль хамгаалагч идэвхтэн Грета Тунбергийг “Ёстой юу ч мэдэхгүй, хөхнөөс гараагүй амьтан” гээд Бразилд уугуул иргэдийн төлөөлөл хоёр хүн амь үрэгдсэнийг хэвлэл мэдээллийн хэрэгслээр хэтэрхий их ярьж дуулиан болгож байна гэж зэмлэсэн байна.
Бразилийн зүүн хойд нутгийн Мараньян мужид уугуул гуажажара омгийн хоёр удирдагчийг дэргэдүүр нь явж өнгөрсөн машинаас буудаж амийг нь хөнөөсөн хэргийг буруушааж байгаагаа залуу идэвхтэн өнгөрсөн ням гарагт хэвлэлээр ярьсан юм байна. Охин өөрийнхөө twitter хуудсанд дэлхий дахин таг дуугүй байхад ой модыг хулгайгаар огтолж сүйтгэхийг нутгийн уугуул иргэд эсэргүүцдэг учраас л тэднийг алж байна гээд энэ бол ёстой гутамшигтай үйлдэл гэсэн юм.
Харин Ерөнхийлөгч Болсонару сэтгүүлчдэд хандаж Мараньяд болсон үйл явдлын тухайд Тунбергтэй санал нийлэхгүй байгаагаа хэлсэн байна. “Грета индианчуудыг Амазоны ойг хамгаалж байсныхаа төлөө амь үрэгдсэн гэж байна. Хамгийн сонирхолтой нь түүн шиг хөхнөөс гараагүй нялх амьтны үгийг хэвлэлүүд шүүрэн авч анхаарлаа хандуулж байх юм” гэж Бразилийн Ерөнхийлөгчийн хэлснийг хэвлэл эш татжээ.
Болсонару бас улс оронд нь гарч байгаа ямар ч үхэл түүний сэтгэлийг түгшээж байгаа гээд харин Засгийн газар улс орондоо хулгайгаар мод бэлтгэх явдлыг багасгахыг хүсч үүний төлөө ажиллаж байгаа гэсэн байна.
Грета Тунберг өөрийн твиттерт байгаа бразилийн ерөнхийлөгчийн бичсэн португаль хэлний “Pirralha” гэдэг үгийг нэгэнтээ оросын ерөнхийлөгч Владимир Путины хэлсэн “Маш сайн охин. Даанч мэдээлэл багатай” гэсэн үгээр сольж өөрчилсөн байна. АНУ-ын Ерөнхийлөгч Дональд Трамп бас Гретаг НҮБ-ын чуулган дээр үг хэлснийх нь дараа “Сайн сайхан ирээдүй хүлээж байгаа маш их аз жаргалтай охин” гэж хэлсэн байдаг.
Ер нь Шведийн байгаль хамгаалагч эко идэвхтэн энэ сурагчийг зүгээр л “Аспергерийн синдромтой, 16 настай эко-идэвхтэн” гэж болно. Шведийн сурагч Грета Тунберг сургуульд суралцахынхаа зэрэгцээ 2018 онд уур амьсгалын өөрчлөлттэй тэмцэх ажлаа идэвхжүүлэхийг Засгийн газраас шаардаж, Шведийн парламентад үг хэлж байсан юм. Түүний санаачилгаар олон улсын хөдөлгөөн өрнөж уур амьсгалын өөрчлөлтийн эсрэг баасан гаргийн FridaysForFuture ажил хаялт давалгаалсан юм.
Олон улсын Засгийн газар хоорондын ажлын хэсгийн дүгнэлтээр бол агаар мандалд ялгарах СО2-ын хаягдлыг тодорхой хэмжээгээр бууруулахад л дэлхий дахины дулаарал 1.5 градусаар багасах юм. Харамсалтай нь энэ хаягдлаа бууруулах болно гэдгээ 12-хон улс орон л илэрхийлээд байгаа юм байна.