БНАСАУ, АНУ-тай харилцах бодлогодоо, цөмийн зэвсгийг хориглох хэлэлцээрээс татгалзах зэргээр илүү харгис хандах болж байна гэж CNN телевиз эх сурвалжаас аван мэдээлж байна. Ийм бодлогынхоо хүрээнд Умард Солонгос удахгүй “Зул сарын бэлэг” барьж магадгүй байгаа нь арванхоёрдугаар сарын эхээр БНАСАУ-ын Гадаад хэргийн яамны нэгдүгээр орлогч сайд Ри Тхэ Соны ярьж байснаас тодорхой байна гэж CNN телевизийн эх сурвалж хэлжээ. Түүний хэлснээр бол Умард Солонгос Вашингтонтой хийж байсан хэлэлцээрээс татгалзахын зэрэгцээ, Пеньяныг цөмийн зэвсэгтэй орон гэдгээ бататгахыг эрмэлзэж байгаа юм байна.

 CNN-ийн мэдээлж байгаагаар БНАСАУ цаашид хоригийг цуцалж эдийн засгаа хөгжүүлэх арга зам эрэлхийлэхийн оронд Ким Ир Сений боловсруулсан төрийн бодлого болох улс орныхоо дотоод амьдралын бүхий л асуудлыг бие даан өөрийн хүчинд тулгуурлан шийдвэрлэх тухай чучхегийн онолыг улам бэхжүүлэн баримтлах бололтой.

 Умард Солонгосын удирдагч Ким Чен Уны энэ баримтлал нь АНУ-ын Ерөнхийлөгч Дональд Трампыг буруутган огцруулах үйл явц эхэлсэнтэй бас холбоотой байж мэдэх юм. Хэргийн учир нь хэрвээ Дональд Трамп 2020 оны сонгуульд ялагдвал түүнийг залгамжлан гарч ирэх хүн Вашингтон, Пеньяны хэлэлцээрийг дэмжихгүй байж магадгүй хэмээн БНАСАУ эмзэглэж байгаа гэж шинжээчид үзэж байна. Харин Д.Трамп сонгуульд ялж дахин сонгогдвол БНАСАУ хэлэлцээрээ сэргээхэд бэлэн байж магадгүй гэж CNN-ийн эх сурвалж хэлжээ.

 БНАСАУ-ын “Зул сарын бэлэг” юу байж болох вэ гэсэн CNN-ийн асуултад Пеньян пуужин хөөргөх юм уу, эсвэл сансарт баллистик технологи ашигласан хиймэл дагуул гаргаж магадгүй гэж сэжиглэж байна. Гэхдээ Пеньяны олон улс дахь худалдааны гол түнш Орос, Хятад хоёр ийм туршилтыг “ноцтой өдөөн хатгасан үйлдэл” гэж үзэх болохоор яг ийм туршилт хийх нь магадлал багатай.
Умард Солонгос үүнээс хойш цөмийн зэвсэггүй болох асуудлыг АНУ-тай хийж байсан хэлэлцээрийн сэдэв гэж үзэхгүй хэмээн БНАСАУ-аас НҮБ-д суугаа төлөөлөгч Ким Сонг үүний өмнө мэдэгдэж байсан. Энэ яриа хэлэлцээ нь Дональд Трамп дахин сонгогдохын тулд дотоод улс төрийн бодлогодоо “цаг хожих” гэсэн заль мэх гэж Умард Солонгосын дипломатч үзэж байгаа юм.