Орост эмч, эмнэлгийн ажилтнуудын алдаанаас болж жил бүр 70 гаруй мянган хүн өвчин нь хүндэрч, хэлмэгддэг хэмээн ОХУ-ын Эрүүл мэндийн сайд Михаил Мурашко Анагаах ухааны болон эмзүйн дээд сургуулиудын ректоруудын зөвлөлийн хуралдаан дээр мэдэгдсэнийг РИА Новости агентлаг дамжуулсан байна.
Үүнтэй холбоотойгоор эмнэлгийн ажилтнуудын сургалтын хөтөлбөрт эмнэлгийн тусламж үйлчилгээ үзүүлэх аюулгүй байдлын дүрэм журмын талаар зайлшгүй оруулах хэрэгтэй байна гэж тэрээр тэмдэглэжээ.
Сайдын хэлснээр бол эмчийн бичсэн эм бэлдмэлээс болж жил бүр хамгийн багаар бодоход 25 хүн амиа алддаг бол түргэн тусламжийн ажилтнууд тэргэнцэр буруу ашигласнаас болж нэгээс хоёр хүн нас бардаг гэнэ.
“Тэгэхээр сургалтын хөтөлбөрт эмнэлгийн тусламж үйлчилгээний аюулгүй байдал, эм, эмнэлгийн багаж хэрэгсэлтэй аюулгүй харьцах асуудлыг зайлшгүй оруулахыг хүсэх байна” гэж Мурашко хэлсэн байна.
Сайд бас эмч, эмнэлгийн ажилтнуудын өвчтөнд эмнэлгийн тусламж үзүүлэх үеийн аюулгүй ажиллагаа үхлийг бууруулах нэг гол хүчин зүйл гэж онцолжээ.
Бүх оросын олон нийтийн санал судлах төвөөс өнгөрөгч 2019 оны арванхоёрдугаар сард явуулсан санал асуулгаар оролцсон хүмүүсийн 41 хувь нь эмч нарын бичсэн эм, зөвлөгөөнд итгэдэггүй, эсвэл дахин нягталдаг гэж хариулж байсан юм. Ялангуяа том хотуудын хүн амын 48 хувь нь эмчид бүрэн итгэдэггүй гэж байхад 950 мянгаас цөөн хүнтэй хотуудад энэ үзүүлэлт 39 хувьтай байна. Харин 60-аас дээш насны хүмүүсийн дийлэнх буюу 43 хувь нь эмчид итгэдэг гэнэ.
Хамгийн аймшигтай нь асуулгад оролцсон хүмүүсийн 42 хувь нь эмчийн алдаанаас болж амжилтгүй мэс засал, эмийн хордлого, хүндрэл зэргийн төлөө прокурорын газарт хандаж байсан бол 27 хувь нь шүүхэд, 36 хувь нь эмнэлгийн ерөнхий эмчид хандан гомдол гаргаж байжээ.

эх сурвалж : "Ардчилал таймс" сонин