Нефть экспортлогч орнуудын байгууллагын хэлэлцээр тасалдаж Саудын Араб дөрөвдүгээр сарын 1-нээс нефть олборлох хэмжээгээ эрс нэмэгдүүлнэ гэж мэдэгдсэн нь газрын тос тээвэрлэх танкеруудыг үнэд оруулна гэж Bloomberg тооцож байна. Хэвлэлд бичсэнээр бол газрын тосны энэ гэнэтийн дайн нь нефтийн өөрийн нь үнийг бараг гурав дахин бууруулах ч зах зээл дээр түүнийг тээвэрлэх хөлөг онгоцны хомсдолд оруулж тээврийн зардал ердийнхөөс бараг долоо дахин өснө гэжээ. Гэхдээ Саудын Арабын National Shipping Co компани өөрийн 40 танкераас гадна дөрөвдүгээр сарын сүүл, тавдугаар сарын эхээр тээвэрлэх 30 хөлөг захиалаад байна. Эдний дунд хоёр сая баррель тээвэрлэх хүчин чадалтай найман том танкер байгаа гэнэ. Ингэснээр Ойрхи Дорнодоос Хятадад ачаа хүргэх танкерийн өртөг хоногт дунджаар 243 мянган ам.доллар болох юм. Харин Энэтхэгийн баруун эрэгт ачаа хүргэх том оврын Princess Mary танкерийн нэг хоногийн түрээсийн үнэ хоногт 400 мянган ам.доллар болно.

Нефть экспортлогч орнуудын байгууллага, Орос хоёрын нефть олборлох хэмжээг хязгаарлах хэлэлцээр үр дүнд хүрэлгүй тасалдсаны дараа Саудын Араб өөрийн олборлолтоо гурван сая баррель болгон нэмэгдүүлж, түншүүддээ бүтээгдэхүүнээ хямдруулах санал тавьсан. Шинжээчдийн үзэж байгаагаар бол Саудын Араб ийм байдлаар Оросыг хэлэлцээр тасалдуулсан хэмээн хэрэглэгч түншүүдийнх нь өмнө ичээхийг хүсч байгаа бололтой.

Гэхдээ эцсийн эцэст энэ бодлогын золиос нь Саудын Араб, АНУ болж, тэд хохирно гэж шинжээчид үзэж байна. Юуны түрүүнд нефтийн орлого нь төсөвт нь том нөлөө үзүүлнэ, харин Америкийн занарын компаниуд нефтийн олборлолт ийм үнэтэй байх нь алдагдалтайг мэдэрнэ гэжээ. Саудын Арабын Эрчим хүчний яам харин дотоодын зах зээлдээ нийлүүлдэг нефтийн хэмжээг хоногт 250 мянган баррель, экспортод гаргах хэмжээгээ хоногт 10 сая баррель болгоно гэж мэдэгдээд байна. Дөрөвдүгээр сар гэхэд нэг хоногт зах зээлд нийлүүлэх хэмжээгээ 12.3 сая баррель болгоно гэж үүний өмнө мэдэгдэж байсан.