Дэлхий дахины нефтийн агуулахууд ойрын саруудад бүтээгдэхүүнээр дүүрч зай үлдэхгүй гэж газрын тос борлуулагчид урьдчилан таамаглаж байна. Financial Times хэвлэлд бичсэ­нээр Нефть экспортлогч орнуудын байгууллага, Орос улс нефть олбор­лол­тоо бууруулахгүй энэ хэвээр үргэл­жилсээр байгаа нөхцөлд шинэ төрлийн коронавирус COVID-19-ийн дэгдэлтээс болоод газрын тосны эрэлт эрс буурах төлөв ажиглагдаж байна гэжээ.
Gunvor компани болохооор нефтийн эрэлт дөрөвдүгээр сар гэхэд өдөрт таван сая баррелиэр буурна, энэ нь дэлхий дахины нийт эрэлтийн таван хувь гэсэн байна. Гэтэл Саудын Араб олборлох нефтийн хэмжээгээ 25 хувь нэмэгдүүлж, дээр нь Орос, Нефть экспортлогч орнуудын байгууллага ч олборлолтоо нэмсээр байгаа. Ийм нөхцөлд нефтийн үнэ улам унасаар, харин нефть олборлогч компаниуд газрын тосны үнэ өссөн цагт борлуулна хэмээн агуулахдаа хадгалж эхэлжээ.
Үүнээс үүдээд юу болох вэ. Gunvor-ийн шинжээчдийн үзэж байгаагаар газрын тосны энэ илүүдэл өдөрт найман сая баррель болох гэнэ. Гэтэл нөгөө талд нь дэлхий дахины нефтийн эрэлт хэрэгцээ 25 хувь буурна гэж Eurasia Group-ийн шинжээчид хэлээд байгаа. Харин нефтийн агуулахуудын эрэлт улам өснө.
Нөгөө нэг зүйл нь нефтийн үнэ хямдарч байгаа нь газрын тос тээвэрлэгч хөлөг эзэмшигчдийн эрэлт нэмэгдэж тээвэрлэх үнэ хэд дахин өсөөд байгаа юм. Саудын Арабаас Энэтхэг рүү нефть тээвэрлэх “Принцесса Мэри” том танкерийг хөлслөхөд хоногийн 400 мянган ам.долларын үнэтэй болсныг Reliance Industries мэдэгдсэн. Дөрөв тав хоногийн замд тээвэрлэснийхээ төлөө компани хоёр сая орчим ам.доллар төлөх болж байна гэсэн үг. Гэтэл өнгөрсөн долоо хоногт гэхэд л Ойрхи Дорнодын орноос Хятад руу нефть тээвэрлэх хөлс 700 хувь өсөөд байна.

Нефтийн үнийн энэ уналт нь Дэлхийн II дайнаас хойших хамгийн муу үзүүлэлт гэнэ

 Баррель нефтийн үнэ 25 ам.долла­роос доош орж байгаа нь эрэлт нийлүүлэлтийн тэнцвэрийг алдагдуулж байгаа дэлхийн зах зээл дээрх Дэлхийн хоёрдугаар дайнаас хойших хамгийн муу үзүүлэлт болж байна гэж Оросын “ТКБ Инвестмент Партнерс” компанийн хөрөнгө оруулалт хариуцсан гүйцэтгэх захирал Владимир Цупров РИА Новости агентлагт хэлсэн байна. “Өнөөдөртөө хараахан хямралын түв­шинд хүрчихээгүй байна. Гэхдээ л баррель нефтийн үнэ 25-аас доош болчихлоо, цаашид 20-оос доош орж ч мэднэ. Энэ бол эрэлт нийлүүлэлтийн тэнцвэр алдагдах байж боломгүй түүх. Ийм явдал Дэлхийн хоёрдугаар дайнаас хойш ер нь байгаагүй дээ” гэж В.Цупров онцолжээ.
Үүнээс үзвэл рулийн ханш ч цаашид унаж, улам үргэлжлэх болно гэнэ. “Нефтийн үнэ цаашид хэрхэн унахаас рублийн ханш шалтгаалж, цаашид унах эсэх нь хамаарна. Үүнийг хэн ч урьдчилан хэлэх аргагүй. Нөхцөл байдал таамаглах аргагүй байхад ямар ч таамаг утгагүй” гэж тэр хэлсэн байна. Газрын тосны олборлолтоо бууруулах талаар Нефть экспортлогч орнуудын байгууллага Оростой тохиролцож чадаагүй учир гуравдугаар сарын 6-наас л рублийн ханш унаж эхэлсэн. Энэ хугацаанд рублийн доллартой харьцах ханш 17, евротой харьцах ханш нь бараг 13 хувь унаад байгаа.

эх сурвалж :"Ардчилал таймс сонин"