ХАА-н зориулалттай жолоочгүй техникүүдийг турших зориулалтын талбайг Орост Ростов мужийн Песчанокопын районд байгуулсан байна. Энэ талбайг жолоочгүй тээврийн хэрэгсэлд зориулан хиймэл оюун ухааны систем боловсруулдгаараа дэлхийд тэргүүлэгчдийн нэг “Cognitive Pilot” компани санаачлан “Песчанокопын газар тариалангийн групп”-ийн баазад тулгуурлан ажлаа эхэлжээ. “Cognitive Pilot” нь Оросын Сбербанк болон “Cognitive Technologies”-ийн охин компани юм байна. Төслийн гол зорилго нь хөдөө аж ахуйн техникүүдэд зориулсан удирдлагын боловсронгуй систем бий болгож дэлхий дахинд санал болгох явдал гэж компанийн ерөнхий захирал Ольга Ускова хэлсэн байна. Бүхий л тээврийн хэрэгслийн оюун ухааны удирдлага ижил. Хамгийн гол нь тухайн техникийн ажлын явцад тохиолдож болох бүхий л обьектын дүрс, мэдээллийг хангалттай цуглуулж түүний тухай техникийн үзүүлэх үйлдлүүдийг программчилж өгөх ёстой гэнэ. “Тэгэхээр энэ нээлттэй талбай нь хөдөө аж ахуйн үйлдвэрлэл явуулахад учирч болох бэрхшээл саад, нөхцөл байдал, цаг уур, гэрэлтүүлгийн өөр өөр нөхцөл зэргийг мэдрүүлэхээр зохион байгуулсан. Энэ бүх нөхцөл нь мэдээлэл цуглуулах, тухайн техникийн аюулгүй байдал, тодорхой ажиллагаанд тохирсон систем зохиоход тус болно” гэж Ольга Ускова хэлжээ.
Ийм хиймэл оюун ухааны удирдлагыг трактор, комбайн, шүршигчид байрлуулах юм байна. Жолоочгүй техник ямар ч саад бэрхшээлийг туулж, цаг агаар гэрэлтүүлгийн ямар ч нөхцөлд хэвийн ажиллахад зориулсан хиймэл оюун ухааны удирдлагын программ бүтээх хангалттай мэдээлэл цуглуулахад 10 секундын 80 мянган дүрс бичлэг авах хэрэгтэй болдог гэнэ. Оросын зохион бүтээгчид энэ ажлаа ирэх оны эхнээс эхлэх гэнэ.

эх сурвалж :"Ардчилал таймс сонин"