Дэлхий даяар хийсэн судалгаанаас үзэхэд компани аж ахуй нэгжүүдийн тал хувь нь улс орныхоо дотоодын хамтрагч, нийлүүлэгчийг сонгох нь илүү найдвартай гэж үзэж байгаа нь өнөөгийн ертөнцөд эдийн засгийн даяаршил эцэс болж байгаагийн шинж хэмээн Германы Die Welt хэвлэлд бичжээ. Хамгийн наад захын тод жишээ гэхэд л амны хаалт гэхэд дэлхий бараг бүхэлдээ Хятадаас хараат байгаа болохоор олон улстөрч, эдийн засагч энэ хараат байдлыг эцэс болгох хэрэгтэй гэж үзэж байна хэмээн Германы RT хэвлэлд бичсэн өгүүлэлд онцолсон байна.
Зөвлөх үйлчилгээний EY нийгэмлэгээс явуулсан судалгаа ч үүнийг хэлж байна гэж Die Welt тэмдэглээд маш олон тооны компани аж ахуй нэгж өөрийн харилцагч, нийлүүлэгчдийнхээ бүтцэд өөрчлөлт оруулж, зөвхөн анагаах ухааны ч биш бүхий л салбарт ингэж өөрчилж байна гэжээ. Ийм байдлаар ойрын жилүүдэд даяаршлаас зайлсхийнэ гэсэн байна.
Өнгөрөгч гуравдугаар сард дэлхий дахины 2.9 мянган компани, аж ахуйн нэгжийн удирдлагын дунд явуулсан санал асуулгад оролцогчдын 39 хувь нь вирусийн халдварын тархалтын үед хүнд байна гэсэн бол дөнгөж таван хувь нь л коронавирусийн халдварын тархалт үйл ажиллагаанд нь нөлөөлөөгүй гэж хариулжээ.
Харин асуулгад оролцогчдын талаас илүү хувь нь өөрийн нийлүүлэлтийн сүлжээгээ өөрчлөх арга хэмжээ авч байна гэсэн байна. Ийнхүү ханган нийлүүлэлт, сүлжээгээ өөрчлөх нь зардал чирэгдлээсээ илүүтэй, найдвартай, тасралтгүй ханган нийлүүлэгч байхыг илүүд үзэж байна.
“Шинэ төрлийн коронавирусийн халдварын тархалт нь даяаршсан эдийн засаг цаашдаа эмзэг болохыг тодорхойлж цаашлаад компани аж ахуйн нэгжүүд орон нутгийн сүлжээ, үйлдвэрлэл илүү болохыг харууллаа” гэж Францын хөрөнгө оруулалтын Ostrum Asset Management компанийн ахлах эдийн засагч Филип Вехтер онцлон тэмдэглэжээ.
Үүний хамтаар Хятадын компаниуд ч нийлүүлэлтийн сүлжээгээ өөрчлөхөд хүрч байна. Даяаршил эрчимтэй буурч, улс орон, засгийн газрууд ард иргэдийнхээ эрүүл мэндийг бодон гадаад худалдаа, аялал жуулчлал, цагаачлалд ч шинэ хязгаар тогтоож магадгүй хэмээн эдийн засагчид үзэж байна. Ийм байдлаар АНУ-ын Ерөнхийлөгч Дональд Трамп болон даяаршлыг эсэргүүцэгчдийн хүсэл мөрөөдөл биелэх нь хэмээн Die Welt хэвлэл эцэст нь тэмдэглэжээ.
Энэ бүхэн бараа бүтээгдэхүүний үнэ өсөхөд л хүргэнэ хэмээн хэвлэл бичсэн байна. Оросын ВЗГЛЯД хэвлэл ч бас үүний өмнө коронавирусийн халдварын тархалтыг энэ даяаршил даван туулж чадахгүйд хүрлээ хэмээн бичиж байсан.

эх сурвалж :"Ардчилал таймс сонин"