Энэтхэг, Хятадын цэргүүд маргаантай Ладакх орчимд гал нээж мөргөлдсөнөөс энэтхэгийн 20 цэргийн албан хаагч амь үрэгдлээ гэж Энэтхэгийн арми мэдэгдсэнийг NDTV телевиз дамжууллаа. “Галван голын районд Энэтхэг, Хятадын цэргүүд зургадугаар сарын 15-наас 16-нд шилжих шөнө буудалцлаа. Мөргөлдөөний үеэр Энэтхэгийн 17 цэргийн албан хаагч хүнд шархдаж, өндөр уулын бүсэд хүйтэн байснаас болоод шархныхаа улмаас нас барснаар нийт амь үрэгдсэн хүний тоо 20 хүрлээ. Энэтхэгийн арми улс орныхоо тусгаар тогтнол, газар нутгийнхаа хуваагдашгүй байдлыг хамгааллаа” гэж армийн мэдэгдэлд дурджээ.
ANI агентлаг үүний өмнө мөргөлдөөний үеэр Хятадын талаас 43 хүн нэрвэгдсэн гэсэн нь амь үрэгдсэн, хүнд шархадсан цэргүүдийг хэлсэн байна. Энэтхэгийн армийн төлөөлөгч бас даваа гаргийн орой Галваны хөндий Ладакхад болсон мөргөлдөөний үеэр манай талаас нэг офицер, хоёр цэргийн албан хаагч амь үрэгдсэн гэж мэдээлсэн. Энэтхэгийн талаас хил дээр шинэ халдлага үйлдсэнийх нь төлөө БНХАУ-ын Гадаад хэргийн яам Энэтхэгийн талд эсэргүүцлээ илэрхийлсэн байна. Энэтхэгийн цэргийнхэн тохиролцоогоо зөрчиж хил даван Хятадын цэргүүд рүү халдсанаар мөргөлдөөн эхэлсэн гэж Бээжин мэдэгджээ. Харин Энэтхэгийн Гадаад хэргийн яам болохоор Галваны хөндий дэх хилийн шугамыг Хятадын тал дангаараа өөрчлөхийг оролдсоноос мөргөлдөөн эхэлсэн гэж мэдэгдсэн байна.
Өнгөрсөн тавдугаар сарын 5-6-ны өдрүүдэд энэтхэг хятадын хилийн өндөр уулын бүс дэх Пангонг нуурын орчим мөн хоёр улсын цэргийнхний хооронд мөргөлдөөн болсны дараа тавдугаар сарын сүүлчээр хоёр улс маргаантай байдаг Ладакх орчимд хяналтын шугам тогтоож тохиролцсон. Энэтхэгийн хэвлэлүүдийн мэдээлж байгаагаар энэ тохиролцооны дараа Хятадын цэргийнхэн Галван голын дэргэд хэд хэдэн майхан босгож, барилгын ажил эхлүүлсэн гэнэ.
Энэтхэгийн Кашмираас хойш уулын бүсэд, мөн Аруначал-Прадеш мужийн зүүн хойд хэсэгт бараг 60 мянган хавтгай дөрвөлжин газар нутгийн талаар БНХАУ, Энэтхэг хоёр улс бүр эртнээс маргаантай явж ирсэн. Улмаар энэ нь 1962 оны намраас хилийн дайн болж өргөжсөн. 1993, 1996 онд Энэтхэг, БНХАУ хоёр маргаантай районуудын талаар энхийн хэлэлцээр хийж гарын үсэг зурсан.

ЭХ СУРВАЛЖ: "АРДЧИЛАЛ ТАЙМС" СОНИН