Хятадын The Paper хэвлэлийн шинжээчид зөвлөлтийн үеийн цөмийн пуужингийн төгсгөл ойртож байна гэж бичлээ. Тэднийхээр бол өнөөгийн Оросын цөмийн хүчин чадлыг АНУ-ынхтай харьцуулбал оросын цөмийн пуужингийн нөөцийн тал нь хуучирч муудсан, хоёр угсраатай шингэн түлшт тив алгасах Р-36М “Воевода” пуужин байгаа. Эд бол өнгөрсөн зууны аль 70-аад онд үйлдвэрлэсэн, галын хүчин чадал өндөртэй ч техникийн шаардлагатай нарийн тоноглолгүй гэнэ.
Орчин үеийн пуужингаас хамгаалах шинэ системүүдийг тойрч гарахын тулд илүү боловсронгуй, хатуу түлшт пуужин хэрэгтэй. Ийм ч болохооор ОХУ одоо “Сармат” баллистик пуужин, өндөр хурдтай “Авангард” пуужин боловсруулаад байгаа.

The Paper сэтгүүл энэ өгүүлэлдээ “Воевода” пуужингийн ашиглалтын хугацаа дуусч байгаа болохоор эдгээрийг “Сармат” пуужингаар сольж эхлэх шаардлагатай гэсэн байна. РС-28 “Сармат” пуужинг оросын арми 2021 онд зэвсэглэлд авах ёстой, гэхдээ цөөн тоогоор. Энэ нь зуны туршилтуудыг олон удаа хойшлуулсантай холбоотой. Одоо оросын армийн зэвсэглэлд 46 ширхэг баллистик Р-36М пуужин, 460 цэнэгт хошуу байгаа. “Воевода” пуужинг Украинд байсан “Южное” зохион бүтээх товчоонд бүтээсэн, тэгээд 2014 оны үйл явдлын дараагаар энэ РС-28 пуужингийн үйлдвэрлэл зарчмын хувьд оросын нутагт шилжсэн юм.
Хятадын шинжээчид, одоо оросын зэвсэглэлд хатуу түлшт “Булава” баллистик пуужин байгаа ч шинэ “Сармат” нь бол мөн л шингэн түлшт пуужин гэжээ.
Хатуу түлш пуужин нь илүү хөнгөн, хадгалж үйлчилгээ хийхэд илүү хялбар байдаг юм байна. Гэхдээ л ОХУ өнөөдөр хятад шиг шингэн түлшт пуужин үйлдвэрлэхээ үргэлжлүүлсээр байгаа гэнэ.