Орегоны их сургуулийн далай судлаачид Аляскийн мөсөн уулнууд, зарим газартаа урьдчилан тооцоолсноос зуу дахин хурдан хайлж байна гэж мэдэгджээ. Ялангуяа Леконт мөсөн гол өмнө тооцоолж байснаас зуу дахин хурдан хайлж байгаа гэнэ.
“Бидний тэмдэглэснээр мөс хайлах явц онолоос 10-100 дахин хурдацтай байна” гэж Орегоны их сургуулийн судалгааны хэсгийн ахлагч Давид А.Сазерланд тэмдэглэжээ.
Энэ мөсөн уулнууд усны түвшингээс дээш харагдаж байгаа ч гэсэн усан доорх ихэнх хэсэг нь хайлсан гэнэ. Мөсөн уулын гадаргуу дээрх ус нь мөсний ангалуудаар доош урсан мөсөн уулын дор урсгал үүсгэн улмаар мөсөн уулыг хагалж байгаа юм. Давсархаг, далайн бүлээн ус мөсөн уулын гадаргуу дээгүүр орж хурдан хайлуулж байгаа гэнэ. Мөсөн уул хайлах өөр нэг шалтгаан нь агаарын температур нэмэгдэж байгаа явдал гэсэн байна. Аляскийн энэ мөсөн уулууд хайлж байгаа нь дэлхийн далайнуудын усны түвшин дээшлэхэд нөлөөлж байгаа юм.

Ийм болохоор мөсөн уулын хайлж байгаа явц нь далайн усны түвшин нэмэгдэх явдлыг таамаглахад тустай гэж судлаачид хэлж байна. Мөсөн уул хайлах явцыг компьютерийн загварт оруулснаар мөсөн бүрхүүл, далайн харилцан үйлчлэлийн талаарх мэдээллийг яг тодорхой гаргахад тусална” гэж АНУ-ын Боулдерийн Цас мөсний мэдээллийн үндэсний төвийн судлаач Твила Мун онцолжээ.