Монгол орны өнөөгийн газар нутгийн төв цэг буюу хүйсийг газар зүйн солбилцлын аргаар тогтоосон байдаг. Тухайлбал, хойд өргөрөгийн 46052I, зүүн уртаргийн 103050I хэмд Монгол орны төв цэг оршдог аж. Энэ нь Өвөрхангай аймгийн Бүрд сумын нутаг Өвөр хөшөөтийн булаг хэмээх газар юм.

Монгол орны төв цэгийн байршлыг газар зүйн шинжлэх ухааны доктор, профессор, Монгол Улсын гавьяат багш Ш.Шагдар 1979 онд анх судлан тодорхойлсон байдаг. Улмаар Өвөрхангай аймгийн ИТХ-ын 1997 оны 42 дугаар тогтоолоор 8.2 ам км талбайг хамруулан аймгийн тусгай хамгаалалттай газар нутаг болгосон байна. Монгол нутгийн хүйс төв цэгийн байршилыг тогтоохдоо дараах дөрвөн аргаар тодорхойлжээ.
1.Газар зүйн солбилцлын арга
2.Тэгш өнцгийн арга
3.Квадратын арга
4.Тойргийн арга.
Хүйс цэг нь Өвөр хөшөөтийн булгийн эх хэмээх газар нь далайн төвшинөөс дээш 1730 метр өндөрт Өвөрхангай аймгийн төвөөс зүүн хойш 115 км, эртний нийслэл Хорхорумаас зүүн урагш 85 км, Монгол Улсын нутгийн захын цэг “Модот хамар”, баруун захын цэг “Мааньт” уулнаас тус тус 1222 км орчим, хойд захын цэг “Монгол шарын даваанаас 670 орчим км, өмнөд захын цэг “Орвог гашууны бор толгой”–гоос 600 гаруй км зайтай оршдог. Мөн дэлхийн экватораас хойш 5194 км, хойд туйлаас ургаш 4808 км орчим зайтай оршиж, дэлхийн цагийн долдугаар бүсэд хамаардаг ажээ. Дашрамд дурдахад, Өргөрөг гэдэг нь дэлхийн экваторын шугамыг 0 хэм, эхлэл болгон авч нэг хэм бүрээр хэвтээ шугамыг өргөргөөр тэмдэглэн хойд ба өмнөд туйлуудыг 90 хэм болгож авдаг. Урагш чиглэлд байгаа хэвтээ өргөргийг өмнөд өргөрөг гэнэ, харин хойд чиглэлд байгаа өргөргийг хойд өргөрөг гэнэ. Зэрэгцээ өргөргүүдийг хооронд нь параллель гэж нэрлэн газарзүйд байрлал чиглэл тогтооход хэлж тэмдэглэдэг. Уртраг нь Английн Грийнвич дэх байрлалыг эхлэл 0 хэм болгон авч дэлхийг босоо шугмаар хувааж баруун ба зүүн чиглэлд нэг градусаар хуваан тоолж зүүн ба баруун чиглэлд тус 180 хэм тоолж, дэлхийг хоёр таллаж хувааж тооцдог байна.