Оны шилдэг бүтээлийн үзэсгэлэнд 135 уран бүтээлч,  уран бүтээлийн нэг нэгдэл нийт 177 бүтээл ирүүлснээс 97 уран бүтээлч, нэг  уран бүтээлийн нэгдлийн 124 бүтээл шалгаран оролцлоо. Дээрх бүтээлүүдээс А.Очирболдын “Ухамсар”, Г.Эрдэнэбилэгийн “Муза”, Б.Отгонтүвдэнгийн “Авга ах”, Л.Гантөмөрийн “Чонон тууль”, Б.Содномдаржаагийн “Тавган дээрх соёл” бүтээлүүдийг улсын санд худалдан авсан юм. Мөн ивээн тэтгэгч байгууллага “Таван нүдэн” брэндийн нэрэмжит шагналыг Монгол Улсын төрийн шагналт уран барималч Ц.Амгалан “Уртын дуу” бүтээлээрээ авсан бол зураач Б.Нямхүү “Домог” монгол зургийн бүтээлээрээ үзэгчдийн таашаал хүртэж, Монголын уран зургийн галерейн нэрэмжит цомын эзэн боллоо.
Үзэсгэлэнд үзэгчдийн сайн мэдэх реалист уран зургийн сод болсон бүтээлүүдээс гадна шинэ үеийн залуу уран бүтээлчдийн шилдэг уран зургууд мөн баримал, перформанс бүтээлүүд хамтдаа дэлгэгдсэн нь урлагийн ертөнцөөр уйдашгүй аялах боломжийг олгосон юм.

 

 

 Намрын үдшийн галарейд

Намрын үдшийн галерейд зочилж  шинэ үеийн дуу авианы уран бүтээлч Домог, Мазаалай, Маандай нарын урцанд хөлөө жийн тухалж дуу авианы далайд умбаж, бэхэн уран бүтээлч Сатудейгийн уран таталбарыг ажиглан суухуйд хүний орчлонгийн гуниг зовлонгоос бүрнээ ангижирч, алжаал ядаргаагаа нэгмөсөн сэгсрэх ховорхон олдох боломж байлаа. Тиймээс урцанд тухлах гэсэн хүмүүсийн дараалал шөнийн 23 цаг хүртэл тасрахгүй байв.
Мөн орчин үеийн перформанс бүтээлүүдэд үзэгч өөрийгөө оролцуулах боломжийг гаргасан хүүхэд залуусын сонирхлыг гойд татаж байв.  “Хүн, байгаль, хайр, эрх чөлөө” уран бүтээлийн нэгдлийн “Khurvas” video инстоляци бол хүн энэ ертөнцөөс тасран үл ойлгогдох нэгэн ертөнцөд түр очоод ирэх мэт агшин хормуудыг бэлэглэсэн маш сонирхолтой ажил байлаа. Дэлгэц, прожектор, саунд, системээрээр бүтээсэн энэхүү инстоляци нь энэ ертөнцийн бүх зүйлд гоо сайхан урлаг ямар нэг хэмжээгээр шингэсэн хүн өөрөө түүний нэг бүрэлдэхүүн хэсэг гэдгийг тодоор мэдрүүлнэ.

Урлаг хүний сэтгэлийг зөөллөж, нийгмийг сүүдрээс аврах гэрэл гэгээ нь ямагт болдгийнхоо хувьд хүүхдэд урлагийн гоо сайхныг аль болох эрт, их мэдрүүлэх нь чухал байдаг. Ялангуяа өнөөдрийн цаг үе шиг стресс бухимдал, уур хилэндээ автсан биднийг урлаг хийгээд ирээдүй үе маань л “аварна”. Гэхдээ бид хүүхдээ яаж урлагт ойртуулах ухаанаа олдоггүй. Харин галарейн зүгээс болон зарим нэг сургуулиуд сурагчдаа галарейн урлагийн боловсрол, сэтгэлзүй, урлагийг өөрөө бүтээх хөтөлбөрүүдэд оролцуулж байгаа нь харахад л сэтгэл тэнийлгэх үйл явдал байв. Хэний ч хориг, хязгаарлалтгүй урлагийн өөр нэг ертөнцөд орсон хүүхдүүд уран зураг үзэж, галарейд газар сууцгаан үзэл бодлоо хуваалцаж, дуртай зургаа зурж, гар урлал хийн төвлөрөн сууцгааж,  уран бүтээлчдийн яриаг шимтэн сонсч байгааг харах нь өөрөө аз жаргалыг бэлэглэж сэтгэл дүүргэж байв. Улаанбаатарт ажиллаж буй олон уран бүтээлийн байгууллагуудаас үзэгчид Монголын уран зургийн галарейн энэхүү үйл ажиллагаа шиг хөтөлбөрүүдийг хүлээж буй нь мэдээж. Хүний үг догширч, үйлдэл зэрлэгшвэл урлагт ойрт гэдэг дээ. Хүний нийгмийн харанхуй мунхгийг арилгах урлагийн ариун гэгээн ертөнцөд алхаж, амар тайван амьсгалах цөөн ч болов өдрүүд олдож  түүнийг алдахгүй хүлээн авч,  хүртэгсэд онцгой сайхан мэдрэмжийг авсныг  хэлэх юун.

 Б.Орхонтуул “Төгсгөлгүй үргэлжлэл” 2019 он,