Индонезийн нийслэл Жакарта хотод энэ сарын 16-нд “Монгол дуурийн үдэш” тоглолт болжээ. Уг арга хэмжээг Индонез дэх Монгол Улсын Өргөмжит консул Чандра Гозали, Монголын Соёлын элч Сэтионо Жуанди Дармоно нарын санаачилгаар зохион байгуулав. “Монгол дуурийн үдэш”-т оролцсон гавьяат жүжигчин, Соёлын элч, дуурийн дуучин Э.Анхбаяр, дуурийн дуучин Д.Отгонжаргал, Д.Дуйнхоржав, дуучин Н.Наранбаатар нар Ж.Пуччини, Ж.Бизэ, Ж.Верди нарын сонгодог бүтээлүүдээс гадна Б.Тийл, Э.Пресли, Ж.Лоуренс, Э.Ньюли нарын бүтээл, түүнчлэн “Би Монгол хүн”, “Монголын тал нутаг” дуунуудаар үзэгчдийн сонор, мэлмийг мялааж, алга ташилт дүүрэн тоглолт болов.
“Монгол дуурийн үдэш” арга хэмжээг Индонезийн албаны хүмүүс, бизнес, соёлын төлөөлөгчид болон Жакарта хотод суугаа гадаадын дипломат төлөөлөгчийн газруудын тэргүүн нар үзэж сонирхсон байна. Уг тоглолтыг Индонезийн хэвлэлд “Чингис хааны эх орны дуурийн дөрвөн дуучин Жакартад хүч түрэн орж ирэв” гэж онцолсон байна.