“Mongol Mountaineering” цахим сэтгүүлийн санаачлагч, уулчин, зураач Ч.Ариунзулын уулын авиралт болон уран бүтээлийн тайлан үзэсгэлэн 2019 оны арваннэгдүгээр сарын 22-нд нээлтээ хийснээс хойш үргэлжлэн гарч байна.  Спортын мастер Ч.Ариунзул нь Монгол орныхоо үзэсгэлэнт байгаль, тив дэлхийн олон өндөр уулсаар 10 гаруй жил аялал авирах явцдаа, уулсын орчинд, халуун уур амьсгалд нь бүтээсэн усан будгийн бүтээлүүдээ дэлгэжээ.
  Мөн авирагч, зураач үзэсгэлэнгийн туршид уулын авиралт, уран зурагтай холбоотой сонирхолтой уулзалтууд, арга хэмжээнүүд зохион байгууллаа. Тухайлбал “Миний хобби” сэдэвт ярилцлага, 
Уулчин Б. Гангаамаатай уулын авиралтын талаар ярилцлага, “Уулчдын дуу хоолой” мөнх цаст уулан дахь хог хаягдлын талаар  хэлэлцүүлэг яриа,  Монголын Усан будгийн холбооны зураачид оролцсон усан будгаар зурах нээлттэй үзүүлбэр, анчин, зураач, аялагч Н. Лхагвасүрэнгийн хобби болон уран бүтээлийн уулзалт, торгон дээр хэрхэн грунт тавьж усан будгаар зурах талаар сургалт, зөвлөгөөг өгөв.  Мөн  зураач, гэрэл зурагчин, аялагч Д. Амараа “Дөрвөн зүгийн аяс” нэртэй уран бүтээлийнхээ тухай сонирхолтой яриа,  анималист зураач Болортуяа “Аялал өөрөө урлаг” сэдэвт үүргэвчтэй арт аяллынхаа талаар сонирхуулсан өгөөжтэй, сонирхолтой үзэсгэлэн дэлгэгдэж байна.
  Ч.Ариунзулын усан будгийн бүтээлүүд нь байгалийн сүр хүчийг илтгэсэн нууцлаг шинжтэй хэрнээ хүн байгаль хоёрын харилцаа, тэнцвэргүй тулаанд хүч сорьж буй хүмүүсийн эр зоригийг илтгэн харуулж чаджээ. Тэр зөвхөн цас мөсний орон өндөр уулыг ч бус Монголын дөрвөн улирлын өнгө төрхийг усан будгаар илэрхийлсэн байна. Хаврын ягаан тэнгэр, гэсч буй гол, нахиалж буй бургас гээд цаанаа л нэг зөөлөн өнгө аястай бол өндөр уулын авиралтын сэдэвтэй зургуудаас нь уулын дагжим салхи шилбүүрдэх шиг мэдрэмж төрнө.
  Уулчин хүн эрэмгий зориг, хүсэл мөрөөдлөөрөө өндөр уул өөд авирдаг. Хүний хөл хөх тэнгэрийн доохно гишгэх нь хэзээнээс хүний өөрийгөө сорьдог хамгийн дээд сорилт ч байж мэднэ. Тиймээс л тэр үзэсгэлэнгээ “Өөдөө урсах өнгө” хэмээн нэрийдсэн буй за.