Их Британийн эзэн хааны шагналт, Лондонгийн Хейуорд галерейн захирал, куратор Ралф Ругофын удирдсан “Сонирхолтой цаг үед амьдрах болтугай” нэртэй Венецийн дүрслэх урлагийн 58 дугаар олон улсын биенналь долоон сарын туршид үргэлжилж албан ёсоор хаалаа. Энэ жилийн наадмын нээлтэд 25000 орчим олон улсад нэр нөлөөтэй урлаг судлаачид, уран бүтээлчид, цуглуулагчид, улс төрчид ирж оролцсон бол нийт 600 мянган хүн үзэж, Хилари Клинтон, жүжигчин Брэд Пит, Жули Эндрюс зэрэг олон алдартнууд зочилсон байна.

Олон улсад нэр хүндээр тэргүүлдэг энэхүү наадамд энэ жил 89 орон оролцсоноос Гана, Мадагаскар, Малайз, Пакистан улсууд анх удаа оролцжээ. Монгол Улс гурав дахь удаагаа “Агшин зуур” нэртэй үзэсгэлэнгээр амжилттай оролцлоо. Монголын үзэсгэлэнг 80 мянган хүн үзэж сонирхсон бөгөөд олон улсын 30 гаруй сэтгүүл хамгийн шилдэг үзэсгэлэнгийн тоонд жагсаасан байна. “Агшин Зуур” үзэсгэлэнд нийлэг материалаар бүтээсэн хар өнгийн абстракт баримлууд байршсан онцлог байлаа. Үзэсгэлэнгийн орон зайнд хөөмэйч Н.Ашит, Д.Дамдин, А.Ундармаа, Д.Даваасүрэн нар Германы домогт уран бүтээлч Карстэн Николайн хамт харилцан үйлдэлт авиан дүрслэлийн туршилтыг хийсэн юм.