Жил бүрийн нэгдүгээр сард зохион байгуулагддаг “Алтан бөмбөрцөг” кино наадам энэ удаа Лос-Анжелес хотноо 77 дахь удаагаа болж дэлхий дахины шүтээн болсон алдартнууд нэгэн дор цуглаж, түүнийг дагаад дэлхий дахины хэвлэл мэдээллүүд, гэрэл зурагчид бужигнасан томоохон үйл явдал боллоо. “Алтан бөмбөрцөг” наадам кино урлагийн салбарын шагнал гардуулах улирлыг ийнхүү эхлүүлэхийн зэрэгцээ тухайн жилийн киноны болон загварын чиг хандлагыг тодорхойлдог гэхэд болно.

 Энэ жилийн наадам цаг уурын өөрчлөлтийн эсрэг уриатай согтууруулах ундаатай ярилцлагатай гээд гэнэтийн сонин үйл явдлууд ихтэй болов. Түүнчлэн жүжигчин Рассель Крөү Австрали улсад ойн түймэртэй тэмцэх бэлтгэлээ хангаж байгаа тул наадамд өөрийн биеэр хүрэлцэн ирж шагналаа гардан авч чадаагүй юм. Мөн HBO сувгийн бүтээл GOT буюу Хаадын тоглоом дэлгэцийн шилдэг цувралаар шалгарна гэсэн найдлага тавьж байсан ч шагнал авсангүй. Дэлхий дахиныг шуугиулж байсан тус цувралын сүүлийн ангиуд сайн хийгдээгүй хэмээн зарим үзэгчид дүгнэж байсантай холбоотой.

 “Алтан бөмбөрцөг” наадмын номинацын нэр дэвшигчид болон ялагчдыг тодруулахдаа 90 орчим улсын 9000 гаруй гишүүнээс санал авах ба энэ нь нэлээд ширүүн өрсөлдөөнтэй болжээ.
Энэ жилийн наадмын онцлох гол үйл явдал нь анх удаа Ази жүжигчин шилдэг гол дүрийн эмэгтэй жүжигчин болж, Хоакин Феникс Жокерын дүрээр хүртэх ёстой шагналаа хүртсэн юм. “Жокер” кино нь нээлтээ хийсэн цагаасаа эхлэн дэлхий дахинд алдаршиж, нийгэм буюу хүмүүс хоорондын харилцааг чадварлаг харуулсан кино гэдгээ баталсан.

 Кино найруулагч Сэм Мендес "шилдэг найруулагч" шагналыг хүртсэн бол түүний бүтээсэн Дэлхийн нэгдүгээр дайны тухай өгүүлэх "1917" кино бүтээл "шилдэг кино" номинацад түрүүлжээ. Энэ үдэш Квентин Тарантиногийн бүтээсэн "Once Upon a Time in Hollywood" кино хэд, хэдэн шагнал хүртлээ. Тухайлбал, тус кино нь "шилдэг инээдмийн кино", "шилдэг кино зохиол" номинацад ялалт байгуулсан бол жүжигчин Брэд Питт "шилдэг туслах дүрийн эрэгтэй жүжигчин" шагналын эзэн болжээ.

 Түүнээс гадна жүжигчин Awkwafina "The Farewell" киногоороо "инээдмийн драм киноны шилдэг эмэгтэй жүжигчин" шагналыг хүртсэнээр бүрэн хэмжээний киноны төрөлд эмэгтэй гол дүрийн жүжигчний шагнал авсан анхны Ази гаралтай жүжигчин болж түүхэнд бичигдлээ. Мөн алдарт жүжигчин Том Хэнкс кино урлагт оруулсан хувь нэмрийнхээ төлөө Сесиль Б. ДеМиллийн нэрэмжит хүндэт шагналын эзэн болсон юм.

 Харин телевизийн салбарын бүтээлүүдийн хувьд "Succession", "Chernobyl", "Fleabag" цувралууд ялалт байгуулсан бол Оливия Колман, Фиби Уоллер-Бридж, Брайан Кокс зэрэг жүжигчид өөрсдийн бүтээсэн дүрүүдээрээ шилдэг нь болж чадсан юм.
Энэ удаагийн наадмын үеэр Леонардо Ди Каприо, Брэд Питт, Женнифер Анистон, Риз Уиттерспун зэрэг олон алдартнууд үдшийн турш шагнал гардуулах нь анхаарлын төвд байлаа.