Циркийн жүжигчин М.Мягмарсайхан экстрем шоуны зараа түгээлээ. Тэрбээр өнгөрсөн жил Улаан цутгалан дээгүүр 28 метрийн өндөр 65 метрийн утсан дээгүүр ямар ч хамгаалалтгүй явж, үзэгчдийг гайхшруулсан. Хүрхрээний цохилт нэмэгдсэн үед, байгалийн сүрдэм чимээнд анхаарлаа төвлөрүүлэн нарийн утсан дээгүүр алхаж чадсан түүний энэ үзүүлбэрийг олон улсад скайволк гэж нэрлэдэг аж. Тэрбээр энэ үзүүлбэрээ Герман, Швейцарьт тоглодог байсан бөгөөд 2009 онд БНСУ-д болсон өндөр утсан дээрх тэнцвэрийн ДАШТ-д оролцож Хан мөрний дээгүүр татсан нэг километр утсан дээгүүр 12 минутад гүйж дөрөвдүгээр байрт шалгарч байжээ.

 Энэ зуны түүний эхний экстрем шоу зургадугаар сарын 25-нд Архангай аймгийн Чулуутын хавцал дээр болно. Тэрбээр өдөр болон шөнө нэг нэг удаа скайволк хийх бөгөөд шөнө нь нуруундаа салюттай алхах юм байна.