М.СОДОН-ЭРДЭНЭ 

 Продюсер Б.Чинбатын хагалгааны дараах эмчилгээний зардалд хандив цуглуулахаар урлагийнхан нэгдээд буй. Хөл хориг тогтоосноос болоод хоёрдугаар сарын 1,2-нд “UB Palace”-т болох байсан тоглолт хойшилж, гуравдугаар сар луу шилжжээ. Тоглолтыг зохион байгуулагчид өнөөдөр энэ талаар албан ёсоор мэдэгдэх аж.
Харин Соёлын гавьяат зүтгэлтэн Ш.Гүрбазар өнгөрсөн баасан гарагт “Ижийнхээ нүдэнд үр нь өтөлдөггүй” хандивын тоглолт, лекц зохион байгуулсан. Өнгөрсөн бямба гарагт “Эника” брэндийн нээлтийн ёслолын үеэр түүнтэй уулзаж цөөн асуултад хариулт авлаа.

-Гүрээ ах аа, тоглолт нь амжилттай юу?
-Сайхан боллоо. Ахынх нь хэр чадал л энэ байлаа. Хоёр дүүдээ найман сая төгрөг цуглуулаад өгчих бололтой шүү.
-Сайхан мэдээ байна. Продюсер Чинбаагийн бие сайн уу?
-Сайн байгаа гэсэн. Хамаг аюулынхаа ард гарсан болохоор эмчилгээгээ гүйцэд хийлгээд тэнхрэх л хэрэгтэй байна даа.
-Ийм сайхан хүмүүсийн итгэл, сэтгэл байгаа болохоор эрүүл энх бодоод ирэх биз ээ. Таны зохиосон “Нутгаа санахуй” дуу яг одоо энэ тайзан дээр эгшиглэж байна. Олон хүний сэтгэлийн илэрхийлэл болдог энэ дууг та хэрхэн зохиосон бэ?
-Би ч өөрөө гадаадад нэг сараас дээш хугацаагаар байж үзээгүй юм. Тэгж удаан байж чаддаггүй. Миний хоёр хүү гадаадад байсан болохоор тэдний минь сэтгэлд юу бодогдож байгааг л буулгах гэсэн дээ. Чинбаа маань ч нутаг руугаа яарч байгаа нь дамжиггүй ээ.