Х.БАЯР

 ОХУ-ын нийслэл Москвагийн “Манеж”-д өнгөрөгч ХХ зууны хамгийн шилдэг зураачдын нэг Сальвадор Далийн зургийн үзэсгэлэн нээжээ. Өмнө нь бүтээл нь орост дэлгэгдэж байгаагүй сюрреализмын энэ алдарт төлөөлөгчийн баримал, уран зураг, усан будаг, зураасан зураг зэрэг нийт 180 бүтээлийг энд дэлгэн үзүүлж байгаа юм байна. Үзэсгэлэн хүссэн хүн бүхэнд нээлттэй.

 ХХ зуун бол бүхэлдээ Сальвадор Далийн уран бүтээлийн тайз байсан гэж болно. Түүний уран бүтээлийг зарим хүмүүс хосгүй гэж шүтэж байхад нөгөө хэсэг нь гажиг хэмээдэг байсан. Өөрийгөө сюрреализмын эзэн хаан хэмээн өргөмжилсөн тэрээр параноидеалийн шүүмжийг үндэслэсэн. Сальвадор Далийг тухайн үед өндрөөр үнэлж байсныг Германы сэтгэлзүйч Зигмунд Фрейд “Тэр бол жинхэнэ шүтэн бишрэгч” гэдгээр илэрхийлж болох байх.

 “Энэ бол Далийн ховор зургуудыг нэг дороос нүдээрээ үзэх ховор боломж” гэж А.С.Пушкиний нэрэмжит Улсын дүрслэх урлагийн музейн захирал Марина Лошак хэлсэн байна. Испанийн зураач, барималч, найруулагч, зохиолч Сальвадор Дали буюу бүтэн нэрээрээ Сальвадор Доме́нек Фелип Жасинт Дали Доме́нек, маркиз де Дали де Пу́боль 1904 оны тавдугаар сарын 11-нд төрж 1989 онд насан эцэслэсэн, сюрреализмын гол төлөөлөгч аж.