Төрийн шагналт, Ардын зураач У.Ядамсүрэнгийн бүтээсэн “Өвгөн хуурч" хэмээх морин хуур барьсан, урт цагаан сахалтай өвгөний зургийг мэдэхгүй монгол хүн үгүй. Зураач уг бүтээлийнхээ өвгөн хуурчаар Чингис хааны дүрийг төлөөлүүлэн зурсан байж болох талаарх судалгаа бий. Өвгөн хуурчийн нүүрний ерөнхий харьцаа, төрх, хамар, хацрын хэлбэр, сахал, хөмсөг нь өнөөдөр хамгийн их түгсэн Чингис хааны хөрөгтэй адил төсөөтэй гэнэ. Урлаг судлаач О.Доржготов "Зураач Ү.Ядамсүрэн гуай “Өвгөн хуурч"-ийн дүрийг бүтээхдээ тухайн үед зурах нь битгий хэл нэрийг нь дуудахаас эмээдэг байсан их эзэн Чингис хааны дүрийг төлөөлүүлэн зурсан байхыг үгүйсгэх аргагүй юм" хэмээн бичсэн байдаг. У.Ядамсүрэн зураач авга ахынхаа бурхан зурах, номын бар сийлэхийг нь олонтоо харж будаг шунх бийрийг нь хийх зэргээр үндэсний уламжлалт уран зургийн техник ажиллагаатай танилцаж авдар сав будах, оймсны хараа, хээ угалз зурах, гэрийн мод будах, хээ тавихаас эхлээд ардын урлагтай амьдралаа холбожээ. Урлаг судлаач С.Лувсанвандан "Дүрслэх урлагийн нэрт мастер Ү.Ядамсүрэнгийн бүтээл нь өнгийн зохицол, эрэмбэ, түүний баяжилт, хөгжилт, зураасны уран бичлэг, угсаатны зүйн үнэмшил, Монголын болон сонгодог зургийн туршлагыг удамшуулан амьдруулж, уламжлан хөгжүүлснээрээ онцгой юм" хэмээн гуай дүгнэн бичсэн байдаг.