БНХАУ-ын Засгийн газрын хөнгөлөлтэй зээлээр хэрэгжүүлэх “ХАА-н бүтээгдэхүүний үйлдвэрлэлийг дэмжих” төслийн нээлт өнөөдөр Тариалан эрхлэлтийг дэмжих санд боллоо.
Төслийн хүрээнд манай улсад бага оврын 24.5 сая ам.долларын 186 трактор, хадлангийн зориулалттай 40 иж бүрдэл техник, таримал тэжээл үйлдвэлэх зориулалттай мөн 20 иж бүрдэл техник, үр тариа, тэжээлийн таримлын 50-125 га талбайг услах 130 ширхэг, төмс, хүнсний ногооны 1-10 га талбайг услах 116 ширхэг дунд болон бага оврын бороожуулагч, жимс, жимсгэнэ услах 90 ширхэг дуслын усалгааны систем болон усалгааны хуванцар хоолойг нийлүүллээ.

“Техникийн төсөл хэрэгжснээр манай улсын төмс, хүнсний ногооны тариалалтын техникийн хүчин чадал одоогийн түвшнээс 10 хувиар нэмэгдэж, жилдээ 100 мянган тонн хадлан, тэжээл, 10 мянган тонн таримал тэжээл бэлтгэх бололцоотой болж буй”-г мөн тэмдэглэн хэллээ. Дээрх тооцоог ХХААХҮЯ-наас гаргасан байна. БНХАУ-аас нийлүүлж буй ХАА-н техник, тоног төхөөрөмжийг 10 хувийн урьдчилгаа төлбөртэй, хоёр хувийн хүүтэй нөхцөлөөр, найман жилийн хугацаагаар газар тариалан эрхлэгчдэд олгох юм. Техник нийлүүлэх төслийн нээлтэнд БНХАУ-аас Монгол Улсад суугаа Онц бөгөөд бүрэн эрхт Элчин сайд Шин Хайминь оролцлоо.