МУИС-ийн Нано-Хиймэл дагуул хөгжүүлэлтийн лабораториас Монголын нутаг дэвсгэрт газар зүйн хэрэглээний зориулалтаар бүтээх анхны “Тэмүүлэл” хиймэл дагуулын төсөл боловсруулжээ. 

Уг төсөлтэй холбогдуулан тус сургуулиас санаачлан бизнесийн байгуулагуудтай хамтран ажиллах зорилгоор бизнес уулзалт зохион байгуулав. Монгол Улсын анхны “Мазаалай” хиймэл дагуулыг 2017 онд хөөргөж байсан баг тэрхүү туршлага, хүний нөөц, сансарт туршсан бааз системдээ суурилан зөвхөн монголын эрдэмтэн судлаач, инженерийн ур ухаанаар “Тэмүүлэл” хиймэл дагуулыг бүтээх юм байна. “Тэмүүлэл” хиймэл дагуул нь Монгол орны зургийг сансраас авч илгээх, цаг уур, хөрс, орчны мэдээллийг цуглуулах, өндөр хүчдэлийн хагас дамжуулагч төхөөрөмжийг сансрын цацрагт эвдрэх магадлалыг шалгах даалгавар биелүүлнэ.
Хиймэл дагуулыг бүтээхэд 300-400 орчим мянган ам.доллар шаардлагатай бөгөөд санхүүжилтээ олж чадвал 2021 оны эхээр хөөргөхөөр төлөвлөжээ. “Тэмүүлэл” хиймэл дагуул нь “Мазаалай”-н адил 10x10x10 см хэмжээтэй, 1.3 кг жинтэй байна.