Засгийн газрын 2022 оны аравдугаар сарын 19-ний өдрийн хуралдаанаар Мэргэжлийн хяналтын Ерөнхий газрыг татан буулгах шийдвэр гаргасан.

Тухайлбал, Байгаль орчин, аялал жуулчлалын яам, Зам тээвэр хөгжлийн яам, Тагнуулын ерөнхий газар, Хил хамгаалах ерөнхий газар, Эрчим хүчний зохицуулах газар, Мал эмнэлгийн ерөнхий газар гэх мэт байгууллага давхар хянан шалгалт хийдэг ажлыг Мэргэжлийн хяналтын байцаагчид давхардуулан хийж ирсэн. Түүнчлэн Хот суурины ус хангамж, ариутгах татуургын ашиглалт, үйлчилгээг зохицуулах зөвлөл, Улаанбаатар төмөр зам нийгэмлэг гэх мэт байгууллагуудын хийх ажил үүрэгтэй давхардсан ажлыг бас хийж төрийн нэрэн дор хүнд суртал улам их болдог байв. Ийнхүү давхар, давхар хяналт шалгалт нь иргэн, аж ахуйн нэгжийн үйл ажиллагааг сайжруулах биш харин ч хүнд суртал, авлига хээл хахууль, өртөг зардал өсч, цаг хугацаа алдагдагдахад нөлөөлөх болсон.

Энэ Засгийн газраас шинэчлэл хийж Мэргэжлийн хяналтын ерөнхий газрын давхардсан үйл ажиллагаа, хяналтыг цэгцэлж эхэлсэн нь өөр хоорондоо ижил, эсвэл биесээ үгүйсгэсэн, хоорондоо зөрүүтэй олон янзын дүгнэлт, гарын үсэг улын болоод хувийн аж ахуй эрхлэгчдэд хүндрэл учруулж ирснийг засах юм. Тэгэхээр Мэргэжлийн хяналтынхны хийж ирсэн ажлыг хэн хариуцах вэ гэх асуулт гарч ирнэ. 26 салбарт хяналт тавьж ирсэн Мэргэжлийн хяналтынхны ажлыг тухайн салбарын яамдад хариуцаж, онцгой болон тусгай чиг үүргийнхээс бусад хяналт шалгалтыг хувийн хэвшил болон төрийн бус байгууллага гүйцэтгэхээр болж байгаа юм байна.

Ингэж мэргэжлийн хяналт нэрэн дор торгоно, хянана гэж айлгаж ирсэн хүнд суртлыг халж оронд нь тухай бүрт хариуцсан хариуцлагыг чангатгаж хянуулснаар  төр засгийн салангид, уялдаа холбоо муутай явж ирсэн байдлыг давхар өөрчлөн шинэчлэх боломжтой болж байна. Юутай ч мэргэжлийн хяналтын явуулдаг үйл ажиллагааг хэн хүнд ойлгомжтой цэгцэнд оруулж эхэлсэн нь иргэн, аж ахуйн нэгжид учирдаг төвөг хүндрэл, хүнд суртал багасах нь.

Х.НАРАН