Налайх дүүргийн Засаг даргын тамгын газар, Нийслэлийн шүд эрүү нүүрний төв, Тайванийн шүдний эмч нарын нэгдсэн холбоо хамтран тус дүүргийн 109 дүгээр сургуульд шүд угаах тэмцээнийг анх удаа зохион байгууллаа.
Тэмцээнд 9-12 насны ЕБС-ийн сурагчид хамрагдав. Мэдлэг шалгах тест болон шүд угаах гэсэн үндсэн хоёр хэсгээс бүрдсэн тэмцээний эхний шатанд нийт 250 гаруй сурагч оролцсон юм.

Тэмцээний нээлтэд Налайх дүүргийн Засаг дарга Ч.Раднаабазар үг хэлэхдээ, “Тайванийн шүдний эмч нарын нэгдсэн холбооноос тав дахь жилдээ эмч нараа илгээж хүүхэд багачуудын шүд амны хөндийн эрүүл мэндийн үзлэг, зөвлөгөө өгөхөөс гадна ард иргэдэд шүдний эрүүл ахуйн мэдлэг олгох сургалт явууллаа. Үүний үр дүнд дүүргийн хүүхэд залуусын шүдний өвчлөл буурсан. Энэ жил шүд угаах анхдугаар тэмцээнийг зохион байгуулж буйдаа баяртай байна. Цаашдаа энэ нь амны хөндийн эрүүл ахуйн боловсрол олгох улсын хэмжээний үлгэр дуурайлал болно гэж найдаж байна” гэв.

Тайваниас Монгол Улсад суугаа төлөөлөгч Хуан Гуо Рун хэлэхдээ, “Тайвань, Монгол орон эрүүл мэндийн салбарт хамтран ажиллаад 20 гаруй жилийн нүүрийг үзэж байна. Өмнө нь эмч эмнэлгийн мэргэжилтэнг чадавхжуулах, эмнэлгийн үйлчилгээний чанарыг сайжруулах чиглэлээр хамтран ажилладаг байсан бол энэ удаагийн тэмцээнээр дамжуулан хоёр талын эрүүл мэндийн хамтын ажиллагаан дахь урьдчилан сэргийлэх чиглэлийн хамтын ажиллагааг албан ёсоор эхлүүллээ. Энэ бол маш том амжилт билээ. Шүд угаах тэмцээнд Монгол орон даяар ард иргэд анхаарлаа хандуулаасай гэж хүсч байна” гэв.

Тайванийн шүдний эмч нарын нэгдсэн холбооноос тэмцээнд түрүүлсэн баг тамирчдыг Тайваньд болох шүд угаах тэмцээнд оролцуулах юм. Шалгарсан сурагчид Тайванийн үе тэнгийн сурагч багачуудтай шүд угаах ур чадвар, мэдлэгээ хуваалцаж харилцан суралцах юм.

Шүд нь яс, мөгөөрс, булчин, шөрмөс, цус, мэдрэл агуулсан бие даасан эрхтэн. Шүдний өвчин даамжирсаар хоолойны ангина болж тэр нь хүндэрсээр үе мөч, зүрх, бөөр өвчлүүлдэг. Эрүүл мэндийн байгууллагын судалгаагаар шүд цоорох өвчлөл нь хүүхдүүдийн дунд 95 орчим хувийн тархалттай байгаа бөгөөд сурагч өсвөр үеийнхэн төдийгүй насанд хүрэгчдийн дунд тохиолдож буй олон архаг өвчний суурь болж байна. Иргэдийн дунд амны хөндийн эрүүл ахуйн мэдлэг хангалтгүй, шүдээ зөв арчлах дадал хэвшил бүрэн төлөвшөөгүйн улмаас бага насны хүүхдийн шүд цоорох өвчлөл буурахгүй байгааг мэргэжилтнүүд хэлдэг.