Эрдэмтэд зүрхний шигдээс өвчнийг анагаах, зүрхний үйл ажиллагааг дэмжих наалт гарсан талаар The Guardian хэвлэлд бичжээ.  Зүрхэнд байршуулах энэхүү наалт нь  3х2 см бөгөөд  өвчтөний нөхөн төлжих эсээс дээж авч, лабораторийн нөхцөлд үржүүлж бүтээдэг байна. Ингэснээр уг наалт булчин болон хувирч,  зүрхний эсийг нөхөн сэргээх урвал явуулдаг аж. “Империал” коллежийн судлаачид тухайн бүтээгдэхүүнийг туулайнд  туршсан нь амжилттай болсон гэж Манчестерт болсон бага хурлын үеэр мэдэгджээ. Британийн зүрх судасны нийгэмлэг  “Клиникийн туршилт нь ирэх жилээс эхэлнэ” гэж мэдэгдэв. Зүрхний шигдээс нь амин дэм, хүчилтөрөгчийн дутагдал, артерийн судасны бөглөрлөөс болж үүсдэг өвчин. Энэ бөглөрөл нь  зүрхний булчинг гэмтээж, зүрхний үйл ажиллагааг доголдуулдаг.  Доктор  Ричард Жаббор “Тун удахгүй эмч нар зүрхний шигдээстэй хүн бүрийг эмчлэх болно. Цаашлаад өвчтөнд шууд суулгах боломжийг бүрдүүлж чадна гэдэгт найдаж байна” гэжээ. Судалгааг санхүүжүүлэгч “British Heart Foundation”-ий профессор Мэтин Акварин “Зүрхний шигдээс хүнийг тамирдуулж, энгийн зүйлсийг ч хийж чадахгүй болгодог  эдгэшгүй өвчин. Хэрэв бид зүрхийг нь нөхөж, эмчилж чадвал олон хүний амьдралыг аварна” хэмээн хэлсэн байна.