Халдварт өвчин судлалын үндэсний төвийн Дархлаажуулалтын албанаас “Дархлаажуулалтын үндэсний хөтөлбөрийн хэрэгжилт” зөвлөлдөх уулзалтыг 2022 оны 4 дүгээр сарын 6-ны өдөр зохион байгуулж байна.

Тус уулзалтад 21 аймаг, нийслэлийн 9 дүүргийн Эрүүл мэндийн газар, төвийн дарга, Дархлаажуулалт хариуцсан мэргэжилтэн, хүйтэн хэлхээ хариуцсан бага эмч зэрэг 110 гаруй хүн оролцож байна.
Уулзалтын үеэр Япон Улсын Засгийн газраас Монгол Улсын Засгийн газарт КОВИД-19 цар тахалтай тэмцэхэд дэмжлэг үзүүлэх зорилгоор 883 сая иений санхүүжилт бүхий “КОВИД-19 халдварт цар тахлын хямралыг арилгахад яаралтай тусламж үзүүлэх хөтөлбөр”-ийн хүрээнд олгож буй зөөврийн компьютерын дээжийг гардуулан өгөх ёслолын арга хэмжээг зохион байгуулав. Тус арга хэмжээнд Эрүүл мэндийн яамны Төрийн нарийн бичгийн дарга Ц.Эрдэмбилэг, ЖАЙКА-Японы Олон улсын хамтын ажиллагааны байгууллагын Монгол Улс дахь Төлөөлөгчийн газрын дарга хатагтай Тамура Эрико болон албаны бусад хүмүүс оролцлоо.

Уг арга хэмжээний үеэр Эрүүл мэндийн яамны Төрийн нарийн бичгийн дарга Ц.Эрдэмбилэг дархлаажуулалтын бүртгэл мэдээллийг сайжруулах зорилтын хүрээнд 21 аймаг, 330 сум, нийслэл Улаанбаатар хотын 9 дүүргийн дархлаажуулалтын байнгын нэгжүүдэд зориулж нийт 548 ширхэг зөөврийн компьютерыг ханган нийлүүлсэн явдалд салбарын нэрийн өмнөөс Япон Улсын Засгийн газарт талархлаа илэрхийлэв.

Япон Улсын Олон улсын хамтын ажиллагааны байгууллагын Монгол Улс дахь Төлөөлөгчийн газрын дарга хатагтай Тамура Эрико хэлэхдээ буцалтгүй тусламжийн хүрээнд гардуулан өгч буй 1,2 тэрбум гаруй төгрөгийн үнэ бүхий дээрх зөөврийн компьютер нь  Монгол Улсын Дархлаажуулалтын өргөтгөсөн хөтөлбөрийн  бүртгэл мэдээллийг сайжруулахад үнэтэй хувь нэмэр оруулна гэдэгт итгэлтэй байгаагаа илэрхийлэв. Түүнчлэн тэрбээр КОВИД-19 цар тахалтай тэмцэж ажилласан эрүүл мэндийн нийт ажилтнуудад талархлаа илэрхийлэн цаашдын ажилд амжилт хүсэв.

Тусламжийн хүрээнд зөөврийн компьютер хүлээн авсан аймаг, дүүргийн Эрүүл мэндийн газар, төвийн төлөөлөл болон Халдварт өвчин судлалын үндэсний төвийн удирдлага талархлаа илэрхийлэв.